ابو زعيتر ولى صعصع واللي دوا يرعف. حيد لصحافي تصاور من تلفونو وحط طونوبيلتو فبلاصة ممنوعة =صور

دابا هاد ابو زعيتر اش من سلطة عندو. اش من صفة عندو. كان فمراكش الاحد بجامع لفنا. جاب طونوبيلتو وحطها فبلاصة ممنوع على الجميع يحطوها. حطها حدا الكوميسارية للي كاينة تماك.
حسب الموقع الاخباري “الزنقة 20″ ل”كود” فان مراسلهم شاف هاد الشي وخدا صور. واضاف الموقع ل”كود” ان ابو زعيتر جا وحيح علي المراسل واكثر من هادا خدا التلفون وحيد التصاور. المراسل وفق مصدر “كود” قال ليه “انت زعما بطل عالمي معروف، هانية نصوروك”. هادا فات ماشي غير الامن حتى القضاء. ممنوع شي ياخد تلفون حد فما بالك بحذف صور. اش هاد التخربيق. كيفاش كيوقع هاد الشي فمغرب هاد ليام.
وحسب مصدر “كود” فان المراسل استرجع الصور عبر اي كلاود. ولكن ماشي هادا هو المشكل. المشكل هو شكون هاد ابو زعيتر حتي يعبت بالقانون. اويلي. يدير ما بغى. بزاف بزاف. وفبدية 2020.