فايك نيوز. رد بالك.. أوديو كايدور كلو كذوب.. واحد السيدة كتداعي بللي تسجلات 300 حالة دالإصابة ب”كورونا” فمراكش بلا دليل

مللي دخل فيروس “كورونا” للمغرب والشائعات كتدور ومابغاتش تحبس، وخصوصا فتطبيق “واتساب”، اليوم الكَروبات فهذ لابليكاسيون كيتداولو واحد الأوديو سجلاتو واحد المراكشية سميتها وفاء، هذشي اللي كتقول هذ المراكشية صعيب يدخل للعقل، والمشكل اأن كاين اللي كيتيقو يا حسرة.
السيدة كتقول، فهذ الأوديو، اللي موجهاه لصاحبتها أو شي وحدة من عائلتها أو كاتعرفها: “السلام فاطمة الزهراء، كيدايرة لاباس عليك؟ بيخير؟ أنا وفاء. شوفي راه كاينة فالمامونية 300 حالة.. أقسم لك يمينا.. ودوك الخيام اللي سيفتليك.. راهم وسط المامونية.. راه حالة طوارئ وماقايلينهاش للناس”.
لاوعلم كيفاش دايرة هذ حالة الطوارئ اللي ماقايلينهاش للناس، وفين عمر شي حالة طوارئ كانت سرية، السيدة اللي قالت فالأوديو عبارة “أقسم لك يمينا” شي ربعة دالمرات، زادت فالكذوب ديالها كاتقول: “أوطيل المامونية هزو منو 200.. و100 هزوها من أوطيل سوفيتيل.. ومراكش خاوي حيت كازاوا والرباطيين فراسهم.. كلشي فراسو مراكش ممنوعة فيه الزيارة.. أقسم لك يمينا إلى هذ الهضرة فري.. والمامونية عامرة بالعسكر”.
وبارطاجات ختنا مع الأوديو تصاور ديال الخيام اللي فعلا نصبوهم من أجل مصابين “كورونا”، لكن ماشي فالمامونية، بل فمليلية المحتلة اللي كيستعدو فيها السلطات الإسبانية “للسيناريو الأسوء”.
لحد الساعة الوزارة علنات على 29 حالة للإصابة “بكورونا” فقط، وهذا هو الرقم الرسمي اللي كاين، وماكاين لا 300 لا 200.
ولو كان كانوا الناس فكازا والرباط عارفين آش واقع فمراكش، لوكان كان الخبار راج مزيان، وكلشي ساق ليه الخبار، والمسؤولين ردو عليه، لكن هذشي مامنوش.