واخا كازا سطات هي اللولة فعدد الإصابات بكورونا فالمغرب.. يوماين هذي ماعلنات مديرية الجهة على أعداد الإصابات فالأقاليم ديالها

هذي يومين المديرية الجهوية للصحة فجهة الدار البيضاء سطات ماعلناتش نهائية على التفاصيل ديال الإصابات بفيروس كورونا المستجد فالأقاليم.
المواطنين، وخصوصا الساكنة ديال جهة كازا سطات، اللي كيهمهم الأمر بالدرجة الأولى، ما عارفين حتى معطى على الإصابات اللي كاينة فالمحيط ديالهم، باستثناء المعلومات القليلة اللي كيصرح بيها مدير مديرية الأوبئة والوقاية من الأمراض، محمد اليوبي، فالندوة اللي كتدار مع الستة، بالإضافة لعدد الإصابات اللي تسجلات فالطوطال فالجهة اللي كيتعلن عليها الموقع المخصص بالرصد الوبائي للفيروس.
المديريات ديال الجهات كاملين مطالبين باش يعطيو معطيات أكثر دقة وتفصيل جوج مرات فاليوم، وتزامنا مع إعلان الوزارة على المعطيات الجديدة المتعلقة بالإصابات والوفيات وحالات الشفاء من الفيروس، مع العشرة ديال الصباح، ومع الستة ديال العشية، لكن أقاليم كازا مازال مامعروف عليها والو، واخا كتعتبر الجهة الأكثر إصابة بالفيروس فالمغرب.
وحاولات "كود" تتصل بالمديرة الإقليمية للجهة للاستفسار على سبب عدم الحديث عن المعطيات الخاصة بأقاليم الجهة، لكن الهاتف صونا بلا جواب.
محمد اليوبي، مدير مديرية الأوبئة والزقاية من الأمراض، تكلم اليوم فالندوة اللي دار مع الستة على تسجيل 18 إصابة جديدة فبؤرة صناعية فكازا، باش يوصل مجموع الإصابات فهذ البؤرة ل49 حالة، مع غياب تسجيل أي إصابات جديدة فبؤر أخرى فكاز، عائلية وصناعية، أما الموقع الإلكتروني الخاص بالوزارة، فكيقول بللي وصلات جهة كازا ل855 إصابة فالمجموع.