درعة تافيلالت باطات الروكور ب118 إصابة جديدة اليوم وجهة كازا سجلات 72 وجهة الشمال 34.. وهاجميع تفاصيل جهات وأقاليم المغرب ليوم

جهة درعة تافيلالت باطات الروكور فعدد الإصابات بفيروس كورونا المستجد اليوم الأربعاء فهذ 24 ساعة اللخرة، بعدما انتشر الفيروس فصفوف العاملين فحبس ورززات، 118 إصابة تسجلات فيها اليوم و112 لإصابة فورززات بوحدها، باش يوصل العدد الإجمالي للإصابات فيها ل210 إصابة، أما عدد الإصابات فالجهة فبلغ اليوم 273، باش تجي فبلاصت الجهة الشرقية فالمركز السادس.
ثاني جهة سجلات أكبر عدد من الإصابات اليوم هي جهة الدار البيضاء سطات، واخا هذي 3 أيام ماعلناتش على تفاصيل الإصابات فالأقاليم ديالها والعمالات ديال مدينة كازا، لكن حسب الموقع الخاص بالرصد الوبائي، فوصلات عدد الإصابات فالجهة اليوم ل917، من اللي كان لبارح 855.
فالمركز الثالث ديال عدد الإصابات اللي تسجلات جديدة اليوم كتجي جهة طنجة تطوان الحسيمة ب34 إصابة، بحيت تسجلات إصابة جديدة فبؤرة صناعية فطنجة، كذلك فبؤرة العرائش، وفبؤرة أخرى فنفس المدينة مؤسسة عمومية كيف ما قال المندوب الإقليمي فحديثو مع "كود" هذ الصباح.
بالنسبة للوفيات الربعة اللي تسجلو اليوم، تسجلات وفاة فجهة طنجة تطوان الحسيمة، ووفاة فجهة الرباط سلا القنيطرة، فالوقت اللي ماسجلات الجهات الاخرى حتى وفاة، وهذا كيعني أن الوفيات بجوج اللي بقاو تسجلو فجهة كازا، واخا التفاصيل مامتوفراش.
أما بالنسبة للتفاصيل ديال الإصابات فالأقاليم، جهة مراكش آسفي كتجي فالمركز الثاني بعد جهة كازا سطات ب742 حالة مؤكدة، بمعنى تزادت ب3 إصابات جديدة، عدد الوفيات بقا هو هو واللي هو 38 وفاة فالطوطال، وكذلك تسجو 3 حالات تعافي جديدة باش يوصل المجموع ل67 حالة، والإصابات موزعة على هذ الشكل: مراكش 471 (حالة جديدة)، الرحامنة 217 (جوج حالات جداد)، الحوز 26، شيشاوة 23، قلعة السراغنة 3، الصويرة 2، واليوسفية وآسفي 0 حالة (آسفي تسجلات فيها حالة من بعد الستة).
فالمركز الثالث كتجي جهة فاس مكناس اللي سجلات 10 حالة جديدة، باش تبلغ فالمجموع 490 حالة، و24 ماتو بلا مايتسجلو وفيات جداد اليوم، وتسجلو 9 دحالات الشفاء الجديدة باش يوصل العدد ل89 شفاء. وبخصوص الحالات المسجلة فالأقاليم فتسجلات 305 ففاس (7 جداد)، 102 فمكناس(2 جداد)، 43 فتازة، 18 فإفران، 11 فصفرو، 7 فتاونات، 3 حالات فمولاي عقوب، حالة فالحاجب، و0 حالة فبولمان.
فالمركز الرابع كتجي جهة طنجة تطوان الحسيمة اللي سجلات اليوم 34 إصابة جديدة، باش يوصل العدد الإجمالي للإصابات ل 461 إصابة، منها 60 متعافين مع تسجيل 9 جداد، و16 وفاة (مع تسجيل وفاة جديدة)، وهذو التفاصيل: 316 إصابة بطنجة (23 إصابة جديدة)، 73 إصابة بالعرايش (9 إصابات جداد)، 58 إصابة بتطوان (إصابة جديدة وحدة)، 13 إصابة بالحسيمة، إصابة واحدة بوزان، و0 إصابة بشفشاون.
فالمركز الخامس، كتجي جهة الرباط سلا القنيطرة، اللي سجلات اليوم غير حالة وحدة جديدة فسلا، باش يبلغ عدد المصابين 282 إصابة، كذلك كاين تسجيل حالة وحيدة للوفيات باش يولي عددها الإجمالي 11، وحالات الشفاء طلعات ل121 لحالة، وبالنسبة للإصابات فالأقاليم فالرباط بلغات 119 إصابة، الصخيرات تمارة 81، سلا 51، القنيطرة 23، الخميسات 7، سيدي سليمان حالة واحدة، وسيدي قاسم صفر حالة.
فالمركز السادس كاتجي الجهة الشرقية بعدما تزادت عندها 7 حالات إضافية اليوم، باش يوصل عدد المصابين فيها ل164 حالة مؤكدة، بالنسبة للوفيات فبقى العدد كيما هو واللي هو 8 دالوفيات، واللي تشافاو حتى هوما 32 حالة شفاء. بالنسبة للتوزيع: وجدة أنكَاد 59 (تزادو 3)، الناظور 39، بركان 38 (تزادت إصابة واحدة)، تاوريرت 9، كَرسيف 8، الدريوش10 (3 جداد)، فكَيكَ حالة واحدة جديدة، وجرادة صفر حالة.
المركز السابع جات فيه جهة درعة تافيلالت، بمجموع 273 حالة مؤكدة، وبالتالي تزادت فيها 118 إصابة من لبارح لليوم، وطلعات عدد حالات الشفاء ل24 فالمجموع مع شفاء جوج حالات اليوم، وبقا عدد الوفيات هو هو والي هو 2 حالات. أما بالنسبة للحالات المسجلة فكل إقليم الحالات فالأقاليم مسجلة 210 فورززات (112 حالة جديدة)، 46 فميدلت، 5 فالرشيدية، 11 فزاكَورة (6 حالات جديدة)، وحالة وحدة فتنغير.
المركز الثامن من نصيب جهة بني ملال خنيفرة اللي تزادت فيها اليوم 4 دالحالات، باش يوصل العدد الإجمالي ل66 حالة مؤكدة، وبقاو حالات الشفاء كيف كانو 13 الحالة، وكذلك الوفيات فبقاو ف6 حالات. وبالنسبة للإصابات فالأقاليم فتسجلات 26 فخريبكَة (حالة جديدة)، 21 فآزيلال، 10 فالفقي بنصالح (3 جداد)، 4 فبني ملال، وحالة وحدة فخنيفرة.
المركز التاسع جات فيه جهة سوس ماسة اللي ماتبدل فيها والو من هذي يومين، بحيت بقات مسجلة فيها 47 حالة، منها 5 وفيات و13 واحد تشافا، وتوزعات هذ الحالات على أكادير إداوتانان ب22 حالة، إنزكَان آيت ملول ب18 حالة، طاطا ب4 حالات، اشتوكة آيت باها ب2 حالات، تارودانت بحالة وحدة، وتيزنيت ب0 حالة.
فالمركز العاشر كتجي الأقاليم الجنوبية اللي ما سجلات حتى شي جديد، جهة العيون الساقية الحمرا مسجلة أربع إصابات فإقليم بوجدور وكلها تعافات، ثم جهة الداخلة واد الذهب اللي مسجلة 2 إصابات فإقليم واد الذهب، تعافات منها حالة وحدة، وجهة كَلميم واد نون، اللي مسجلة حالة وحدة مؤكدة فكَلميم، وهذ الحالة تم الشفاء ديالها.
وبالنسبة للمجموع، محمد اليوبي، مدير مديرية الأوبئة والوقاية من الأمراض، علن فالندوة داليوم الأربعاء مع الستة دالعشية على تسجيل 3446 حالة دالإصابة بكورونا فالطوطال، منها 149 وفاة، و417 واحد تشافا.