بالتصاور: علاش البوليس مع الحموشي ولى جهاز كيحتارموه لمغاربة فزمن "كورونا فيروس". خدمة كبيرة وتجارب كثيرة باش وصلو لجهاز كيحتارم القانون وخاص اجهزة اخرى تستافذ من تجربتو

البارح خرجات "كود" خبار اعتداء مخازنية على نائب وكيل الملك بطنجة. بعدها خرج تسجيل صوتي فيه التفاصيل. قبلو كانت احداث مختلفة لحالات الاعتداء تعرضو ليها مواطنين من قبل مخازنية ومقدمين وشيوخ وقياد. تسجيل صوت وصورة. فكاع هاد الحالات اداراتهم ضربات الطم. وصل الاعتداء حتى للصحافة.
جهاز واحد دوز خدمتو نقية. هو جهاز الامن الوطني اللي اليوم يحتافل بالذكرى 64 لتأسيسه. احتفال بلا احتفالية مع حالة الطوارئ الصحية بسباب هاد الجايحة اللي سببها فيروس كورونا.
علاش هاد الجهاز دار خدمة نقية كيقولها الواقع. كتقولها المعطيات اليومية؟ لانو احتارم المواطن المغربي. دار خدمتو فاطار القانون. حتى باش كيتعرض للسب او للاعتداء كيدي مول الفعلة للقضاء. ما كيضرب ما كيعنف. طبعا كانو حالات قليلة بدات من اسفي واخرها فسلا لبوليس ما حتارمش القانون. هنا الادارة العامة ما رحماتش مالين الفعلة. اللي فرط يكرط. العقاب الاداري والقضاء يبقى الحكم بين هاد الشرطي وبين المواطن.
فحادثة اسماعيل بلخياط خو منصف بلخياط. ما شفتاش البوليس ضرب مواطن اتهمو بسبو واهانتو. شفنا البوليسي مشى للقضاء. تحكم بعام ابتدائي وفالاستئناف خرج بعد ما كان دوز شهر حبس. البوليس ما احتجش علي قرار القاضي. بل دار المساطر القانونية اللي كتعطيها ليه العدالة. احتارم دولة الحق والقانون
لكن هاد الاحترام لدولة الحق والقانون. هاد الخدمة النقية ما جاتش بين ليلة ونهار. هو ثمرة لخدمة طويلة. بطلها عبد اللطيف الحموشي المدير العام للمديرية العامة للامن الوطني ومدير المديرية العامة لمراقبة التراب الوطني. بطل حقيقي لرجل الدولة هادا المسكون بخدمتو. بخدمة بلادو. تعطاتو اغراءات كثيرة باش يخدم فامريكا كيف كشفات "جون افريك" قبل اشهر٬ ورفض. فضل يخدم بلادو. ما نهدروش اليوم على دورو لكبير والحاسم بالمديرية العامة لمراقبة التراب الوطني اللي خلات بلادنا تنجو من عمليات ارهابية كبيرة. بلا خدمتو كذلك فمحاربة الجرائم العابرة للقارات. فمحاربتو لشبكات الاتجار فالمخدرات بكل انواعها. بلا ما نهدرو على هاد الجهاز واش كيدير اليوم فحرب جديدة ضد فيروس وقف العالم كولو. نهدرو على خدمتو باش وصل لمديرية الامن الوطني.
هاد المديرية شدها "جسد كبير مريض". شدها فالانعاش. كلشي الامراض فيها. كلنا كنعقلو على ديك الفترة. جا اولا وبدا كيدير ديها الحكامة. كتاشف فضايح فالصفقات من الكمبيوترات والمطبعات ولوراق حتى البنزين. اكتاشف فضاعات بالنسبة لي اخطرها ان كلاب الادارة العامة للامن الوطني كانت جيعانة وفبلاصتها دار مسؤول امني سابق فوجدة كلبو. جمع كلاب الدولة وكان معيش كلابو بفلوس الدولة. قمة الاستغلال باش توصل للحيونات اللي ثمنها غالي وتداربيها طويلة.
حتى تعويضات الشرطة كان فيها تلاعب. لخماج يا لمخماج. دقة دقة بدات الامور تتقاد. ولى جهاز فيه الحكامة. الارقام كتهدر.
حتى تطعيم الشرطة باطر كفءة دارو. ولاو الامتحانات كيدوز فشفافية. الحموشي عارف ان جهاز امن قوي محتاج لاطر وطنية واعرة. هاد الشي علاش المديرية العامة كلفات الجامعات بالامتحانات. تسد الباب علي الرشاوية فهاد الادارة. طبعا بلا ما نهدرو على التعيينات فالمناصب المهمة محليا ووطنيا. اللي بغى شي بوسط خاص يكون عندو تصور يقادو ويدافع عليه.
امور كثيرة دارت. بالاضافة الى هاد الشي هاد الجهاز دوز تجارب. احتجاجات عشرين فبراير لاشهر. احتجاجات يومية فالمدن المغربية. حراك الريف. ودابا هاد الوضعية ديال حالة الطوارئ الصحية. بوليس كيف دوزنها فشهادات ف"كود" خدام ليل ونهار ضد عدو غير مرئي. خايف علي عائلتو. لا نعاس مقاد. لا رمضان مقاد. لا فطور مقاد. مضحي بكلشي باش يخرج سربيسنا علي خير.
فهاد المحطات تطور اداء الامن الوطني. ولى كيدير خدمة نقية. لهاد الشي كولو اللي ذكرنا كان هاد الجهاز نقطة ضوء بين اجهزة خاصها مسافة كبيرة باش توصل او خاصها حموشيات كثار. تجربة ممكن لاجهزة اخرى تستافد منها.