البراءة لطالبة قتلات عساس حاول يغتصبها فدار دالكرا

حكمات غرفة الجنايات الابتدائية فمحكمة الاستئناف بالرباط، ببراءة طالبة من تهمة "الإيذاء العمدي المفضي للموت"، دون نية إحداثه.
حسب مصادر متطابقة، فالطالبة، اللي فعمرها 19 العام، ودوزات 9 شهور فالاعتقال الاحتياطي بالمركب السجني بالعرجات، كانت كتقلب على الكرا، ومشات شافت شقة فعمارات الأمانة بتمارة، وفاش سولات العساس طلع معاها يوريها شي برطمة، قبل ما يسد عليها ويحيد سروالو باش يغتصبها، الشيء اللي خلاها تدفعو بالجهد حتى طاح ومات.
والطالبة نكرات فجميع مراحل الدعوى أنها كانت عندها نية تقتلو، وقالت انها دفعاتو غير باش تدافع على راسها، ومن بعد ما تحالت على النيابة العامة تعرضات على قاضي التحقيق اللي أمر بإيداع الموقوفة رهن الاعتقال الاحتياطي.
وتبين للمحكمة أن الطالبة بريئة من بعد شهادة الزوجة ديالو اللي أكدات ان راجلها ديجا مريض بالربو وكيجيه ضيق تنفسي حاد، وشهادة الجارة اللي قالت انها سمعات الغوات، وفاش توجهات للبرطمة لقات الرجل ممدد على الارض وسروالو محيد والطالبة فوضع هستيري.
والطالبة فهذ الأثناء كتبحث هي ومحامي ديالها على صيغة باش تاخد تعويض على ديك 9 شهور اللي دوزاتها فالاعتقال الاحتياطي، من بعد ما بانت البراءة ديالها.