انا كمغربية فرحانة بالتطبيع مع اسرائيل ! دولة صديقة ! فيها بزاف ديال المغاربة لي كانتشاركو معاهم اللغة و المطبخ و الموسيقى ! و كانشوف بلي احسن كادو عطاه سيدي ربي لدول الشرق الاوسط هوا جاب اسرائيل و حطها وسط منهم! باش يتعلمو منها التحضر و النقا و التطور...

اسرائيل دولة رائدة ! أحسن نموذج د الدولة يمكن تلقاه فالشرق الاوسط ! بالرغم من انها عاشت سنوات بين جيران كايكرهوها ! فمناخ طاغي فيه الارهاب و التفرگيع و الحروب ! الا انها نجحات تخلق دولة محترمة وسط الخراب د الشرق الاوسط ! دولة مؤسسات ! دولة بمدارس محترمة و جامعات كبيرة و اقتصاد كايحقق نسبة نمو مرتافعة عام على عام ! كاتصدر التقنيات الدقيقة و الدياموند ... دولة بشوارع نقية و طوبيسات منظمة و مستشفيات بمعايير اوروبية ! هادشي كلو حققاتو اسرائيل وسط التهديدات الارهابية و الحروب !
عطيوني نموذج واحد ددولة فالشرق الاوسط تقدر دير شنو دارت اسرائيل فالمدة لي دارتو فيها ؟! بل عطيني دولة فالعالم حققات التطور لي حققاتو اسرائيل فمدة قصيرة ؟! كاينة دولة وحدة ! كوريا الجنوبية ! اما فالشرق الاوسط اينما وليت وجهك فداك القنت فالكرة الارضية غايبان ليك غير الفقر و البطالة و الوسخ و الحروب و الدمار !! واش كاينة تما شي دولة كاتحمر لوجه ؟ والو ماكاين ماتهز باللقاط ! دول غارقة فالجهل و الخرافة و العواطف !
داكشي علاش انا كانعتابر بلي احسن كادو عطاه سيدي ربي لدول الشرق الاوسط هوا حط بيناتهم اسرائيل باش يتعلمو منها !
بالنسبة لخبر التطبيع مع اسرائيل ! كمواطنة مغربية فرحت ليه بزاف حيت غايكون فيه خير كبير للمغاربة ! اسرائيل دولة متقدمة فبزاف د المجالات و عندنا فيها جالية مغربية كبيرة كاتموت على تراب المغرب و ديما هازين الضرابو ! غانستافدو معاها فالعلاقات الاقتصادية و السياسية و العسكرية و حتى من ناحية السياحة ...فاش غايتحل خط جوي مباشر بين اسرائيل و المغرب اكيد غايتشجعو بزاف د الاسرائيليين يجيو يضربو الطنجية و الطواجن فمراكش و يتبحرو فأگادير و ياكلو ليزويتر ديال الداخلة ! و هادشي مايمكن يكون الا ايجابي للمغرب و المغاربة !
بالاضافة لهادشي مقاطعة اسرائيل ماحققات تا خصية فهاد المدة كاملة و خصوصا للقضية الفلسطينية! سنين و الدول العربية مقاطعين اسرائيل و كايجيشو الشعوب ديالهم باش يكرهوها و كايدعيو على اسرائيل فصلواتهم " واللهم احصهم عددا و اقتلهم مددا و لا تغادر منهم احدا ...."! و بالمقابل اسرائيل تبارك الله و الصلى عنبي ربي معاها غي ماغادة و كاتزيان و تكبر و تتطور و تتنقا و الدول لي كاتدعي عليها غادية و كاتغرق فالجهل و التخلف و الحروب و القهرة ! و القضية الفلسطينية غادة و كاتعكس و ولات وسيلة للابتزاز و البيع و الشرا بين الفصائل ! و اسرائيل تسير و الكلاب تنبح !
اليوم الحل هوا الانفتاح ! هادي وقت الحوار و المفاوضات و المصالح ! طبعا هاد الخبر كيما كنت متوقعة خرج جيوش الخوامجية و السلفيين من الجحور و عطاوها للبكا و التخنان فالصفحات ديالهم ! كاتسمع غي " الله المستعان" كاتشير ! كاين لي وصلات بيه الوقاحة يكفر اي واحد مع التطبيع و يعتابرو خرج من الاسلام و خان " القضية" ! ولكن لا عزاء للحاقدين لي موحال واش يجيهم النعاس اليوم ! و برافو للديبلوماسية المغربية على هاد الخطوة الرائعة !