ديك القضية ديال آجيو ندافعو على فلسطين ديمودات و ستنزفتوها ! غير قلبو على شي موضوع آخر ديتورنيو بيه لاطونسيو ديال بنادم على القضايا الاساسية لي كاتشغلو

ملي عقلت على راسي و هاد القضية الفلسطينية داخلة معانا جنب فالقضايا لي كاتشغلنا ! شحال خرجت تانا فالمظاهرات فاش كنت كنيمة يامات الكوليج و الليسي و غوت تا بحيت ” دم عربي واااحد قدس عربي وااااحد ” ” خيبر خيبر يا يهود جيش محمد سيعود ” ” بالروح بالدم نفديك يا فلسطين” ! شحال خرجت و غوت و نددت ب” العدوان الصهيوني الغاشم” ! رسمت تانا طابلو فيه محمد الدرة و باه و شاركت فيه فمسابقة ثقافية و ربحت بيه جائزة ! و درت الكوفية الفلسطينية و قريت شعر محمود درويش و حفظت ” ايها المارون بين الكلمات العابرة” و كنت كانتبورش فاش كانوصل لديك :
منكم السيف –
ومنا دمنا
منكم الفولاذ والنار-
ومنا لحمنا
منكم دبابة اخرى-
ومنا حجر
منكم قنبلة الغاز –
ومنا المطر
وعلينا ما عليكم من
سماء وهواء
فخذوا حصتكم من
دمنا وانصرفوا
شوف البهلان كي داير ! خدو صحتكم من دمنا و انصرفوا ! الشعر لي كايعلمك الخنوع !
هادشي للحمد لله فالجاهلية ديالي ! قبل مانعيق بالقالب! قبل مانعيق بلي انا كتلميذة مغربية عندي قضايا اهم بكثير و اسبق بكثير من القضية الفلسطينية و نقول لراسي ” آش كاتخوري آ آنسة ؟” ! آش بينك و بين شي فلسطين ! وا دوري غير بجنابك غاتلقاي عندك مواضيع اهم من فلسطين ! و بلي غزة كاينة غير فالخرجة د الرباط ! ! راه الافلام الميريكانية فاش كايبغيو يمثلو فالديكور ديال بغداد و لا فلسطين بعد الحرب و القصف كايجيو للمغرب و كايلقاو الديكورات واااجدة كاتسناهم باش يتورنيو الافلام ! ديكورات الحرب بلا حرب ! ديور رايبة بلا حرب ! مظاهر فقر بلا حرب ! حتى من وجوه الناس لي مدوزة الحرب كايلقاوها بلا حرب.
القضية الفلسطينية كانت لمدة طويلة و لازالت واحد الوسيلة لالهاء الشعوب على القضايا الاساسية لي خاصها تشغلهم ! كايتخباو موراها الانظمة و الاحزاب و الحكومات باش يتلفو الناس على الاعداء ديالهم الحقيقيين و يخلقو ليهم عدو يفرگعو فيه گاع داك للغل و الظلم لي كايحسو بيه وسط بلاداتهم ! و عوض يدورو الطبسيل جيهت الحكومات ديالهم و يطالبوهم بحقوقهم و يتحاسبو معاهم ! ! كايضورو الطبسيل جيهت ” فلسطين” باش يعوضو داك النقص ف”تابوطوليت” لي ماكايحسوش بيه وسط بلادهم ! و حيت العرب ديال القرن العشرين عندهم واحد الجوع كبير للبطولات التاريخية و حيت مادارو تا بطولة و لا انجاز تاريخي يعاودو عليه و يرفع ليهم المعنويات كاتبقى ليهم هاد القضية الفلسطينية باش يشمو فيها ريحة ” النضال” زعما راه مازال كايقيمو!
انا كمغربية الصراحة كانشوف عرام ديال القضايا اهم ليا من القضية الفلسطينية و كاتمسني بشكل اكبر من القضية الفلسطينية و كاتأثر على حياتي بشكل مباااشر كل نهار ! يكفي انه معدل الناس لي قارية ففلسطين واصل ل99 فلميا ! تسعود و تسعين فلميا آ سيموحمد حسب احصائيات اليونيسيف! اكبر بكثير من المغرب!! 91 فلميا من الطفلات الفلسطينيات كايمشيو للمدرسة في الوقت لي مازال نسبة كبيرة من بنات المغرب ماكايمشيوش للمدرسة يا ايما حيت بعيدة على الدوار ! يا ايما حيت اسرهم ماعندهمش الامكانيات ! يا ايما حيت سيفطوهم واليديهم يخدمو فكازا و الرباط و مراكش و يصبو الگراصن ديال اطفال قدهم عندهم الزهر عليهم حيت تزادو فاسر لاباس عليها و يوجدو ليهم الگوتي لي يديو للمدرسة.
حيت فالوقت لي كايكونو فيه الاطفال الفلسطيين كايقراو فالمدرسة باش يبقا داك الرقم ديال تسعود و تسعين فلميا هوا هوا واخا الحرب واخا القصف واخا القنبول ! كايكونو فيه بزاف ديال الاطفال المغاربة واقفين فالمحلبات و الحوانت كايسربيو الكليان سيفيانا فنص خبزة و يهزو البوطة للكليانات و فاش كايسالي النهار كايطلعو للسدة ينعسو فيها كي الكلاب ! شكون دابا كايتقنبل هادو و لا لخرين ؟ غا هاد الارقام و الفوارق الكبيرة فالتعليم و فظروف العيش بين فلسطين و المغرب راه نورمالمو كافية باش تخليك تضرب الطم و تكمش و تسد دلقوشك للابد و تديها فالجيهة ضارراك !
راه الصهاينة ماشي هوما هادوك لي لهيه ! الصهاينة الحقيقيين هوما الفقر و الزلط و الجهل لي كاينخر فالجسد ديال المجتمع نهار على نهار ! و العدو ديال المغاربة ماشي هوما ” الصهاينة” ، العدو ديال المغاربة الحقيقي هوا التعليم لي فالحضيض و السبيطارات لي مافيهمش الخيط و الادارات العمومية لي مازال فيها عقلية دهن السير يسير !
وا حشمو شوية على عاراضكم ! حشمو و شوفو ليكم شي بريكول آخر تركبو عليه باش تلاهاو !
البلاد مقلوبة بالمقاطعة ! و شركات كبيرة مهددة ! و المغرب كايمر من مرحلة جديدة تقدر تكون مصيرية من بعد ! و واحد لابس اللبسة ديال العسكر و هاز كابوس ديال الما و هابط كايغوت ” خيبر خيبر يا يهود” ! كايمارس تابهلاوانيت ديالو !
وا بالخرزي اليهود راه عندهم 3 ديال الاطباء لكل الف مواطن ! نتا لي مازال عندك 0.3 طبيب لكل الف مواطن ! يعني تا طبيب ماكاملش غا الربع ديالو.
اسرائيل راه غير هادي شي يامات باش حتافلات بعيد ميلادها ” السبعين ” ! قدها قدك و لا تلقاها صغيرة عليك نتا لي طاحو ليك السنان و مركب فم عوج تبدا تهضر و يخرج ليك الدفال و بداك الزهيمر تحط سريويلك و ماتعقلش فين…
ديك سبعين عام لي فعمرك و دوزتيها خواضات فالجماعات و الاحزاب و البرلمان و هريف و تغماس فالمروق و لحيس زكاك ! اسرائيل بنات فيها دولة ! فمناخ مكهرب و وسط الحرب و القذائف و الصواريخ و وسط جيران كايكرهوها و ماحاملينهاش و كايكيدو ليها المكائد !اسرائيل بنات دولة ديموقراطية باقتصاد قوي و واحدة من ارقى الجامعات فالعالم !و مستوى تعليم ممتاز و بنية تحتية على مستوى عالي بطرقانها بمينائاتها بمطاراتها بمدارسها…، و خلقات معجزة اقتصادية كاتقرا كنموذج فالكليات ( جوج د الدول فالعالم لي حققو هاد المعجزة كوريا الجنوبية و اسرائيل) !
طز ! بقات فالكابوس د الما و ” خيبر خيبر يا يهود “
آ سير آوا سير !