الوضعية الوبائية غادة وكتتحسن. نشرة كورونا النصف الشهرية: كاين انخفاض كبير فالموت والإصابة والحالات النشيطة.. ومؤشر توالد الحالات نزل لاول مرة على المؤشر العالمي – فيديو

مازال الوضعية الوبائية دفيروس كورونا المستجد فالمغرب كتحسن، وهذشي اللي بينات عليه وزارة الصحة، فتصريحها النصف شهري، فالفترة الممتدة ما بين 18 و1 فبراير 2021.
وحسب ما قال قال عبد الكريم مزيان بلفقيه، رئيس قسم الأمراض السارية، أن مؤشر تراكم الحالات ونسبة الوفيات والإصابات غادة وكتنقص، بحيث نقصات حتى على المعدل العالمي، وهذي أول مرة كيسجل المغرب مؤشر تراكم الحالات مستوى أقل من المستوى العالمي، حيت سجل 1297,2 لكل 100 الف نسمة مقابل 1330 لكل 100 الف نسمة عالميا.
بالنسبة لنسب الشفاء والإماتة، ففحدود ولبارح الاثنين، المغرب سجل نسبة 1,8 فالمية فالموت، مقابل 2,2 فالمية كنسبة عالمية فالموت، و95,5 فنسبة الشفاء مقابل 72,6 فالمية اللي كاينة عالميا.
بخصوص الوفيات الأسبوعية، فعرفات أكبر انخفاض فهذ المدة، بحيث سجلنا انخفاض ديال 40 فالمية بالمقارنة مع الأسبوع اللي فات، وشمل هذ الانخفاض 10 جهات.
وحتى عدد الإصابات اللي تسجلو هذ الأسبوع الأخير نقصو بشكل كبير، بحيث عدد الحالات المسجلة عرفات انخفاض للاسبوع الحادي عشر على التوالي وهكذا نقص عدد الإصابات بالمقارنة بالأسبوع اللي فات ب26,4 فالمية، وهذ الانخفاض تسجل ف11 جهات أبرزها جهة كَلميم وادنون اللي سجلات انخفاض ديال 78,5 فالمية.
بالنسبة للحالات النشطة، حتى هي عرفات انخفاض، دزنا من 16804 حالة نشطة هذي جوج سيمانات إلى 13099 ولبارح، اي بمعدل انخفاض ديال 22 فالمية، واعلى رقم ديال الحالات النشطة كان هو 49800 حالة، ف17 نونبر 2020.
أما بالنسبة لمعدل الإصابة الأسبوعي لكل 100 ألف نسمة، فحقق انخفاض ل13,3 فالاسبوع الأخير، بينما كان محدد ف19,5 فبداية يناير.
أما عدد المرضى اللي كاينين فأقسام الإنعاش فحتى هوما نقصو هذ السيمانة ب20,4 فالمية، بحيث فالجوج سيمانات اللخرين، دزنا من 937 حالة ل744 حالة ولبارح.
وبخصوص مؤشر توالد الحالات على الصعيد الوطني فنهاية الأسابيع اللي فاتو، فبلغ ف10 يناير 0,94، و17 يناير 0,88، و24 يناير 0,90، و0,84 ف31 يناير، وهذا كيعني أنه غادي وكتنخفض.
وبالنسبة لترتيب المغرب عالميا، أكدات وزارة الصحة فنشرتها أن المغرب بقى فالرتبة 34 على مستوى الإصابات، كيف بقا فالرتبة 37 من ناحية الوفيات، ونقص ب3 رتب من ناحية الكشوفات طلع للرتبة 40.
وعلى المستوى الإفريقي ترتيب المغرب ماتغيرش، بحيث باقي الثاني إفريقيا على مستوى الإصابات والكشوفات، والثالث فعدد الوفيات.
https://m.facebook.com/story.php?story_fbid=1558865357634476&id=272656359588722