بسباب التلاعب الضريبي. نيستلي المغرب تجمعات عليها مليار درهم ديال الخطية

طالبات إدارة الضرائب شركة "نستلي" السويسرية، بأداء ضريبة تبلغ مليار درهم (110 مليون دولار)، بعد مراجعة دارها فريق التدقيق الضرائبي التابع للمديرية العامة للضرائب فالرباط.
وتوجهات ل"نستلي" تهم بتنظيم تحويل الأرباح بشكل مشبوه للشركة الأم، عن طريق خفض الدخل الخاضع للضريبة فالمغرب، والتلاعب بأسعار التحويلات وفواتير البيع والشرا والأرباح والخدمات.
ورسل الفرع الرئيسي للشركة فجونيف محامين ضرائب تزادو على مستشارين محليين من شركة EY، باش يعاونو الشركة الفرعية فالإجراءات قدام اللجنة الوطنية للاستئناف الضريبي، باش يعترضو على هذشي.
واتصلات الشركة مع إدارة الضرائب للتوصل إلى اتفاق ودي، والحصول على روميز ضريبي، وإيمان الزاوي، المديرة الإدارية ديال فرع نستلي فالمغرب واثقة من نتائج هذ المفاوضات: "الطريقة اللي خدامة بيها نستلي فالمغرب هي نفس الطريقة اللي كتخدم بيها جميع فروع المجموعة فالعالم".
وواخا هكذاك، هذشي ممكن ماينجحش، حيت مصدر كيقول أن المفاوضات بين نستلي والسلطات الضريبية المغربية قربات للانهيار كثر ما هي قريبة للاتفاق.
القانون المغربي كيقول أنه فالاتفاق بين السلطات الضريبية واللي كيعطيو الضرائب، كيكون الروميز غير على مبالغ الغرامات المعطلة أو المبالغ اللي ممكن تدفعها الشركة للحصول على مساعدة تقنية، وماشي التخفيض على فاكتورة الضريبة على القيمة المضافة اللي ماتعطاتش لخزانة المملكة.