كلشي كان حاظي من البي جي دي وصحاب الاسلام السياسي خرج ليهم اليسار الموحد. واش لائحة الاسلاميين ولا الاشتراكي الموحد؟ النص دايرين الحجاب والنص لاخر ماحاطينش تصويرتهم.. ووكيل اللائحة ل"كود": اللي بغات ماديرش تصويرتها هي حرة

اللائحة النسائية اللي وضعها الحزب الاشتراكي الموحد للانتخابات الجماعية لمدينة خريبكة فشي شكل واللي شافهة يحساب ليه فوتوشوب او ديال شي حزب اسلامي ما بغاش يكشف على راسو.
اللائحة فيها 7 نساء، كلهم محجبات، ومن ضمنهم حتى وكيلة اللائحة، بالإضافة ل6 نساء أخريات ماحاطينش صورتهم أصلا، واخا ضروري خاص صورة المرشح والإسم ديالو يكونو فجميع اللوائح الانتخابية.
اللي فشي شكل فهذ القضية كذلك هي أن الحزب يساري اشتراكي. كان عندو تاريخ طويل مع الاسلام السياسي. هاداك ماشي نگاب ماتنا. اي النگاب المغربي الاصيل بل حجاب الاخوان المسلمين المستورد من المشرق. وهذشي ماكترجموش هذ اللائحة، اللي محيدة تصاور النساء، بحال بالمنط الداعشي اللي ما كيبغيوش يبينو وجه لعيالات گاع، زعما باعتبارهم "فتنة وعورة".
وتعليقو على هذشي، قال عبد الواحد لهبي، وكيل اللائحة الجماعية للحزب فخريبكَة ل"كود" أن النساء الرجال ايضا عندهم كل الحق فوضع الصور دبالهم أو لا، خصوصا، واكد أنه فتاريخ الانتخابات كلها، كتلقى ناس من الجنسين ماباغيينش يحطو صورهم، "ومعانا طبيبة، ورفضات تحط ثورتها واسمها كذلك"، حسب تعبيرو.
وبالنسبة للحجاب، تساءل لهبي، فتصريحو ل"كود": "وشنو المشكل فالحجاب؟ اللي بغات الديرو هي حرة...".
من جهتو، قال عبد اللطيف اليوسفي، القيادي وعضو المكتب السياسي للحزب الاشتراكي الموحد ل"كود"، أن الحزب دابا في بداية الحملة، وكان اخر اجل الاربعاء فاش توضعات اللوائح النهائية، ومازال الصور ديال المرشحين ماوصلوش كاملين، وهذا علاش ماكاينينش صور المرشحات.
وزاد، فتصريحو ل"كود"، أنه الى حدود الامس كتوصل الصور الى المقر، وأنا متأكد أنه بالنسبة لخريبكة تم الإسراع بوضع اللوائح قبل ما يوصلو صور رفاق ورفيقات اخرين.."، حسب تعبيرو.
وقال انه ماشي شرط يتحطو جميع المرشحين، بحيث يمكن الاكتفاء ببعضهم فقط، لكن من غير المعقول بالنسبة ليه يتحطو صور ناس وناس لا، "هذشي ماعندوش علاقة بالموقف، كاين احتمال ماسافطوش الناس الصور فالوقت وصافي"، كيف قال.
وبالنسبة للحجاب، قال اليوسفي أنه من مدة طويلة، اي من 2002 لدابا، جميع اللوائح كانو فيهم المحتجبات، الشكل بالنسبة ليه فالاصل حرية فردية، والحزب كيدافع على حرية الافراد، لكن القناعات الداخلية الاساسية هي اللي خاص يآمنو بيها جميع الأعضاء، والوفاء لقيم الحزب وأفكارو.
ومن ضمن هذ القيم الدفاع على الحرية والكرامة والعدالة والديمقراطية، وتبني مبادئ كالمطالبة بالإصلاح الدستوري ومحاربة الريع والفساد، كيف قال اليوسفي.
"يقدو يكونو ناس مادايرينش الحجاب ومع ذلك كيتبناو فافكارهم داعشيين أو كيتبناو الليبرالية المتوحشة، وناس دايرينو وكيآمنو بقناعات الحزب ومشروعو المجتمعي... واش الإنسان داير اللحية أو الحجاب او لا او كيشرب أو مصاحب أو لا فهذي حياتو الشخصية ولا تهمنا في شيء"، حسب تعبيرو فتصريحو "كود".