كيفاش واحد سلفي مدوز السطاج فالسعودية و شبعان فلوس قطر كايهاجم المدونة لي جابها ملك البلاد و لي كاتعتابر خطوة كبيرة و مهمة فالدفاع عن حقوق المرأة و حماية الاسرة ؟

عقلتو على نهار مات العالم الكبير ستيڤن هاوكينغ و ناض واحد بولحية كتب تدوينة " نفق ملحد" دار فراسو الضحك كايدوي على عالم كبير فحالا كايدوي على بهيمة ! ايوا نفس بولحية رجع هاد الايام بتدوينات اكثر بهلوانية و من بعد ماهاجم المدرسة العمومية و ماخلا ماگال فالمرأة العاملة و كايحرض بوقلوات لي تابعينو مايتجوجوش بيهم ( و غير بصحة تادوك لي متبعينو مافيهم مايتلبق) اليوم ناض كايهاجم المدونة ! ايه نعام آ سي المدونة لي جابها ملك البلاد محمد السادس حفظه الله و لي كاتعتابر من ابرز الانتصارات لحقوق المرأة و لي كان الهدف منها انها تحفظ حقوق المرأة و ترسخ المساواة بينها و بين الراجل ! مدونة الاسرة لي كاتعتابر وحدة من اهم الخطوات لي دارها المغرب فالمجال الحقوقي و من اهم المشاريع لي بغاها و دارها ملك البلاد اليوم واحد بولحية مدوز السطاج فالسعودية و شبعان فلوس قطر كايتهجم عليها و ماشي غير كايتهجم عليها و كايقول بانها اصل الفساد بل كايشجع الناس لي متابعينو انهم مايحتاكموش ليها !
القانون ديال البلاد بغانا هادا مانخضعوش ليه ! واش ماشي ضسارة كبيرة هادي ؟
راه هاكا كايبداو الاحداث الارهابية و هاكا بدات سطاش ماي واحد النهار ! بدات بناس كاتهاجم قوانين البلاد و مؤسسات البلاد و كاتقول على القوانين احكام الطاغوت تزرع الفساد بلا بلا بلا ... كاتبدا بهاد الهضرة و كاتسالي بشي مسطي مستاعد يشتت زكو فشي اوطيل و لا ريسطورون باش يمشي للجنة طمعا في الحور العين !
انا كمراة مغربية كانعتابر المدونة من احسن المشاريع لي اشرف عليهم ملك البلاد و كانشوف انها كاتحميني نسبيا و بالمقارنة مع مدونة الاحوال الشخصية لي كانت شحال هادي ! و كانشوف انها كاتحمي بزاف ديال النساء و كانطمع انها تزيد تتحسن و تساير التطور لي كايطرا فالمجتمع باش توفر مساواة حقيقية النساء و قوانين تحمي الاسرة المغربية !
اويلي فين كنا و فين ولينا ؟ شحال هادي المرا كانت كاتكون جالسة فالدار حتى كايتم داخل عليها الراجل بالمرا الثانية ماكاتعرف راسها باش تبلات ! ماكاين لا موافقة لا ستة حمص ! و كانت تقدر تكون جالسة فدارها حتى توصلها براتها مافخبارهاش هي گاع راه مطلقة ! كانو العيالات مظلومات و مقهورات ! ماعندهم كلمة و ماعندهم حق !
ولكن هاد السلفيين فالوقت لي حنا كانقلبو نزيدو بالبلاد القدام باغين يرضونا اللور ! يرضونا للقوانين القروسطية ! والافكار الظلامية الاقصائية تجاه المرأة ! و الخطير فهادشي انهم فحالا كايبنيو دولة وسط الدولة ! فحال هاد الداعية لي حتى حاجة ماعاجباه ! لا مدارس الدولة عاجباه ! لا مؤسسات الدولة عاجباه لا قوانين الدولة عاجباه ! علاش كايقلب ؟ يدير دولة وسط الدولة ؟
آطونسيو ! هاد الفيلم راه فايتين مفرجين فيه!