الاحتجاجات ضد الباص ڤاكسينال او كيفاش معارضي النظام ركبو على قرارات غبية متسرعة. راه العدل ما سوقهاش فصحة لمغاربة همها هو النظام وراه اكبر عدو للجسد هو تحالف العدل مع صحاب منيب واللي شاط فيهم وزيدو لعيالات باش يعطيو شرعية شعبية لاحتجاجهم

الاحداث فالمغرب كتسارع. البارح كانت احتجاجات ضد الباص ڤاكسينال شاركات فيها بقوة العدل والاحسان ودخلات فيها حتى التراس الكورة ودردرات بشي بركة ديال اليسار. ايلى كانت ديك الاحتجاجات بصاح ضد اجبارية جواز التلقيح كانت تكون مفهومة. غير هي عندها اهداف اخرى او هدف واحد ما منوش جوج وهو ضرب النظام. ماشي الحكومة. ديك الشعارات ديال اخنوش ارحل وهو مازال ما بداش خدمتو غير تغطية.
اللي نظم هاد الاحتجاجات وساهم فحضور ناس كثار هو العدل والاحسان. تزامن خروجهم مع حدث اخر مهم هو عودة عبد الاله بنكيران لقيادة حزب العدالة والتنمية. العدليون عارفين ان عودة ميسي البي جي دي غادية ضربهم اكثر. هاد الشي بان ليلة السبت باش صوتو عليه 81 بالمائة من مجلس حزبو الوطني لمنصب الامين العام. كانت اول كلمة ليه هدرات على الحزب وشددات على نقطة اساسية. الدولة المغربية خاصها تبقى قوية. ما خاصش اللي يضعفها واللي ضعفها غاديين نواجهوه كبي جي دي. الملك والملكية ما كاين معاهم مزاح. هادوك لحمة قوة دولتنا.
بنكيران ما كانش يخاطب صحابو فقط. كان يخاطب خصومو من الاسلاميين وخاصة العدل والاحسان. هما ردو عليه فالنهار الثاني اي البارح باش نزلو لمغاربة للاحتجاج. طبعا عارفين العدليين باللي بنكيران ما يقدروش عليه. عندو الكاريزما وكلام واعر وسياسي ذكي. يعني داك الفراغ اللي كانو عايشينو البي جي دي ايام بنعرفة سالى. دابا مرحلة اخرى.
فهاد المرحلة كفة بنكيران لمواجهة اهداف العدل والاحسان اللي غادية تربح.
اللي ما مفهومش البارح هو كيفاش صحاب نبيلة منيب مولات نظرية المؤامرة بخصوص التلقيح٬ واللي كيتقدم ديما مبررات منقولة حرفيا من صحاب نظرية المؤامرة فالغرب٬ دخلو فتحالف مع صحاب العدل والاحسان. كيفاش ليگو ديال وحدة ورط تيار يساري كيرفض حتى ينسق مع صحاب عبد السلام ياسين.
هاد الياسينيين كيف شفناهم البارح ينزلو يطبقو اش قال ليهم صحافي قناة قطر "الجزيرة" السوري فيصل القاسم. هاد الغبي اللي خدام عند موزة قال باللي احتجاجات اللقاح فالمغرب تقدر تكون بحال احتجاجات الكوميرا فالثمانينات. ناس العدل والاحسان بان ليهم هاد الشي يقدر يصدق باش يوصلو للحكم ويطبقو مشروعهم فالحكم. صديقهم السوري المتخلف دار اكثر من تدوينة على المغرب كلها مغالطات واكاذيب بحالو بحال هاديك القناة ديالو
ايلى لاحظتو كانو اذكياء باش ختارو لعيالات اللي يخرجو بزاف. اولا باش القوات العمومية ما تعداش عليهم واخا الاحتجاج ممنوع زمن حالة الطوارئ الصحية وثانيا باش يمسو مشاعر لمغاربة ويكسبو تعاطفهم. غير هما شي وحدات رجعو ضحكة. بحال هاديك اللي كتقول جسدي حريتي. وحدة عندها مشكل كبير مع الجسد. جماعة كتكره الجسد وخارجة كتوظفو فشعاراتو. باش كتكون العلاقات الرضائية فالجنس او الحب ما كيكونش ديك الساعة جسدي حريتي. باش كتلبس المغربية اللي بغات ما كيكونش ديك الساعة جسدها حريتها. كيولي جسدها ملك للمجتمع. ملك للاسلاميين هما اللي كيحددو اش دير من شرويطة فشعرك واش من قياس تلبس فجلابيتك.
المهم هدف العدليين ماشي الحرية. ماشي الاحتجاج. ماشي اللقاح. هدفهم الحكم. هدفهم يديرو ثورة. من حقهم هاد الشي غير خاصهم يخرجو ليها كود وصافي