أخطر أزمة كتواجه بلادنا هي الجفاف فالتواصل الحكومي وها علاش اخنوش تلقا ضربات بالفايك نيوز

اييه اخنوش ماشي هو المسؤول على زيادة الأسعار، هادي حقيقة اقتصادية غادي يقولها اي واحد كيفهم شويا ف الاقتصاد، أما الخبراء فكلهم كيعطيو تفسيرات لهاد الزيادات ف الأسعار بكون معظم دول العالم كامل بدات تخرج من أزمة كوفيد والنشاط الاقتصادي تحرك وكاين رواج وطلب كبير على النقل البحري للي تزاد ثمنو فكولشي (حتى الحاويات لي تزادو بزاف). ورغم ذلك شي وحدين مسيسيين وآخرين تا بعينهم حالفين يلصقو كولشي لاخنوش، وهادشي داروه شي وحدين مع بنكيران فاياماتو.
الحكوكة ماشية مسؤولة على الجفاف ولا على الزيادة ف الأسعار، َلكن راها مسؤولة بزاف على غياب التواصل على الفايك نيوز لي منتشر بزاف، فلا وزارة المالية خرجات توضح هاد الزيادات ولا الناطق الرسمي باسم الحكومة كيجاوب الصحافة ولا رئيس الحكومة دار مبادرة يخرج للإعلام الرسمي ويشرح كولشي.
وحسب خبير فالاقتصاد هضر مع "گود" بأن اغلب المواد الأولية طلعو (بترول، زيت،.. الفوسفاط) ، حيث فاش بدأت الدول ترفع القيود على الحركة التجارية، رجع الرواج والطلب على البواخر للي كانت معطلة فيامات كورونا وبسبب اغلاق الحدود، دبا هادو عليهم طلب كثير والعرض هو هو، هادشي تسبب ف ارتفاع أسعار النقل البحري وهادشي إثر على المحروقات والمواد الأساسية َكولشي تزاد.
الحلول مكاينش دبا، من غير بعض الترقيعات اللي ممكن تكون ف قانون مالية تعديلي.
الخبير الاقتصادي رشيد أوراز سبق أكد فحوار مع "گود" بأن إحداث قانون مالية تعديلي لن يحل المعضلة، لأن المشكل أكبر من مشروع ميزانية، خصوصا في ظل وجود مشاكل كبيرة على مستوى الاستثمار الخارجي وتراجع الدولة في تفعيل الإصلاحات الهيكلية المرتبطة أساسا بالحكامة وإصلاح صندوق المقاصة وإصلاح صناديق التقاعد وغيرها .."
وأوضح أوراز، الباحث كذلك في المعهد المغربي لتحليل السياسات (MIPA)، في حوار مع "كود"، أن "الاستثمارات في المغرب تعرف انتكاسة غير مسبوقة، بحيث أن صندوق الاستثمارات الخاص المحدث مؤخرا، لا يتوفر على موارد مالية بسبب قلة مصادر التمويل والمشاكل التي تعاني منها الدول المانحة، سواء الأوربية أو الخليجية".
وقال الباحث الاقتصادي بصريح العبارة ل"كود" :"الحقيقة هي أن الدولة معندهاش ميزانية الاستثمار معندهاش موارد مالية، واخا تدار صندوق خاص بالاستثمار ملقاتش باش تعمرو، وحتى المانحين لي كانت كتعتمد عليهم الدولة (الخليج، اوربا..) كيمرو بأزمات سياسية او اقتصادية".
وحسب نفس الخبير، فالأزمة الاقتصادية فالمغرب عندها جذور قبل كورونا، هادشي فيه تراكمات.
دبا كاين لي باغي يصفي حساباتو مع اخنوش بسبب أزمة عندها جذور قبل سنوات من هاد الحكومة، ولا يعقل تتم محاسبة حكومة والمطالبة بحلها في ظرف قصير من تعيينها.