ملف "الجنس مقابل النقط".. حركة "معاً" فسطات خرجات طول وعرض فالمحامي ديال الرباط اللي تهجم على الصحافي الشاهد: تكون عندك الجرأة وطلب خبرة على ليكونفيرساسيون من لابيجي ولا الجدارمية

النقاش الهامشي اللي كيخلقو دفاع المتهمين فالملف ديال "الجنس مقابل النقط" كيزيد غير يغرق الهوة ويورط المتهمين، بحيث أن هاد الكلام الخاوي اللي كيقولوه هاد المحاميين هامشي وكيولد نقاش اللي كل مرة كيبانو معاه معطيات جديدة.
المحامي إبراهيم منقار، اللي هو من هيأة الرباط، عربط مزيان على الصحافي الشاهد فالجلسة وقال فحقو سب وشتيمة وقذف وبان أنه حاقد عليه ماعرفناش بالضبط سبب هاد الحقد، لكن الصحافي والزميل ياسين حسناوي، اللي هو شاهد فهاد للملف كان جوابو واضح: "كل واحد كيعبر على مستواه".
الفرع الإقليمي ديال حركة "معاً" فسطات، واللي المنسق ديالو هو الشاهد نفسو، خرج ببيان استنكاري ضد الكلام اللي قالو المحامي المذكور.
البيان اللي اطلعات عليه "گود"، قال على أن الطريقة اللي تكلم بها المحامي ابراهيم منقار، ماعندها علاقة بأخلاق مهنة المحاماة، وأن اتهامو للشاهد بأنو "مغتصب فالصغر" هو تبليغ بجريمة عارفها ماوقعاتش وأن خيالو واسع فهاد الشي.
واستنكرات الحركة قذف هاد المحامي للمحصنات بحيث تكلم بالسوء على الزوجة ديال المنسق الإقليمي للحركة واللي اتاهمو بللي اغتصبها قبل ميتزوج بها.
في المرافعة ديال المحامي منقار قال على أن الشاهد "مايستحقش يكون باحث فالشؤون السياسية". الحركة استنكرات هاد الكلام لأنه ماكيستاندش على منطق وأكدات بللي مايمكنش المحامي يفهم حسن من اللجان العلمية اللي دوزات امتحانات لمنسق الحركة.
وسجلات حركة "معاً" فمقطع مصور بأن هاد المحامي ما ضابطش حتى تصريحات الشاهد حيث بدا كيقول معطيات مغلوطة وكاذبة للرأي العام.
نقطة أخرى شار ليها البيان الاستنكاري هي أن هاد المحامي خاص تكون عندو الجرأة ويمشي يطلب خبرة على الكونڤيرساسيون اللي عند الفرقة الوطنية للشرطة القضائية ولا عند الدرك الملكي.
وزاد المحامي اتاهم الشاهد، المنسق الإقليمي لحركة "معاً"، (اتاهمو) بللي عاير سطات، وهادي كذبة واتهام فحق المنسق بحيث أنه كيعتز بانتماؤو لهاد الإقليم وكيدافع عليه بصفتو صحافي وباحث جامعي ومنسق إقليمي للحركة.
النقطة قبل اللخرة اللي شارت ليها حركة "معاً" هي دعوتها لهاد ابراهيم منقار باش يمشي يقرا القانون ديال المحاماة.
وفاللخر من بعد ما قال الفرع أن منسقه الإقليمي غادي يمشي للقضاء، قطر الشمع شوية على المحامي وقاليه: "سير اطالع ليك على أطروحة تناقشات السيمانة اللي فاتت بعنوان 'المحاماة في المغرب بين الأخلاقيات والتخليق' واللي دارها رمز من رموز المحاماة اللي كيمثلو هيأة الرباط أحسن تمثيل".