الوزير عبد اللطيف الميراوي فرسالة لرئيسة الجامعة ديال سطات: بعدما دازت 4 شهور القانونية على توقيفهم خاصك تجيبي أساتذة "الجنس مقابل النقط" للمجلس التأديبي

من بعد الضجة الكبيرة اللي دارها دفاع المتهمين فملف "الجنس مقابل النقط" فسطات، اللي كان آخرها تهجم المحامي بهيأة الرباط، ابراهيم منقار، على الصحافي الشاهد فنفس الملف واتهامو اتهامات خطيرة وماسة بالشرف وفيها قذف للمحصنات وماكتشرفش مهنة المحاماة گاع وكتسيء خصوصا لهيأة الرباط بزاف.
وفي جديد الملف كشفت مصادر مطلعة لموقع "گود" ان وزير التعليم العالي والبحث العلمي والابتكار، عبد اللطيف الميراوي، صيفط مراسلة لخديجة الصافي رئيسة جامعة الحسن الأول بسطات، كيقول فيها بأنه خصها تعرض الأسياتذة المتهمين على المجلس التأديبي ابتداءً من نهار 21 فهاد الشهر.
وكتجي هاد المراسلة من بعد ما قربات تسالي مدة 4 شهور على توقيفهم على مزاولة العمل ديالهم وتوقيف الصاليرات ديالهم فانتظار حكم المحكمة.
مصدر "گود" قال بللي هاد المراسلة كتقول بأنه ابتداء من 21 في الشهر غيخص عرض الأساتذة المتهمين على المجلس التأديبي.
وكيتزامن انعقاد المجلس التأديبي مع جلسة المحاكمة المقررة نهار الإثنين الجاي.