فضيحة الموظفين الأشباح فجماعة الرباط وصلات للبرلمان

صيفط محمد أوزين، النائب البرلماني عن الفريق البرلماني ديال حزب الحركة الشعبية، سؤال لوزيرة الانتقال الرقمي وإصلاح الإدارة، على ظاهرة الموظفين الأشباح بناء على تصريحات للسيدة رئيسة بلدية الرباط.
القيادي الحركي أوزين جا فالسؤال ديالو، اللي توصلات بيه "كَود"، بللي رئيسة المجلس الجماعي للرباط كانت صرحات فبرنامج تلفزيوني ف"2M" بأن 2400 موظف من أصل 3500 موظف بإدارة الجماعة، محسوبين من "الأشباح"، وهذا كيعني أن "الثلثين ديال موظفي جماعة الرباط كيشدو شهريا الصاليرات ديالهم بلا مايديرو حتى شي حاجة، بلا حتى شي مقابل، ولا تقديم أية خدمة عمومية وكيستنزفو اعتمادات طائلة من المال العام بدون موجب حق".
أوزين اعتابر بللي هاد التصريح ديال رئيسة بلدية العاثمة الرباط كيبين أنه كاينة فضيحة اللي مطلوب تتحرك ضدها كل الأجهزة الرقابية وكل المؤسسات المعنية لكشف تفاصيل هاد الظاهرة الخطيرة، واللي قد تعرفها قطاعات ومؤسسات وجماعات ترابية أخرى.
وسول أوزين نفس المسؤولة الحكومية على واش غادي تفتح شي تحقيق فهاد الفضيحة وعلى أشناهي الإجراءات اللي باغية تديرها.