ومن بعد؟.. الباباراتزي صورو آمبر هيرد كتقدا من محل ديال الحوايج الرخاص فميريكان – فيديو

موقع "TMZ" الميريكاني سرب فيديو لآمبر هيرد وهي كتقدا من محل "تي جي ماكس" (TJ Maxx) اللي كيبيع الحوايج بأثمنة رخاص بزاف مقارنة مع المحلات اللي بحالو فميريكان.
آمبر هيرد كانت فالمحل هي وختها، وفاللول ما رداتش البال بللي كاين شي واحد كيصور فيها ولكن مللي عاقت حاولات تمشي دغيا من المحل.
البعض فالصحافة الميريكانية حاول يطلعها على آمبر هيرد، وقالتطو بللي ضربها الزلط وولات كتمشي للمحلات الرخيصة (بالمعيار الميريكاني)، خصوصا أنها محكوم عليها باش تخلص خطية ب8.5 مليون دولار لطليقها جوني ديب.
وفالمقابل ردو عليهم بعض المتابعين عبر مواقع التواصل الاجتماعي بللي حتى حاجة ما كتفرض على أي شخص كيفما كان يشري من هذا المحل أولا لاخور من غير رغبتو هو وأشنو كيبغي و حسب الستيل و القناعة ديالو، وهادشي ما عندو علاقة لا بالواحد يكون مرفح أو لا، عكس المعايير "المريضة" اللي فرضاتها المجتمعات وكتقيس الناس بيها، وقالو بللي متجاوزة وقديمة.