ها الإصابات اللي كاينين فالوداد قبل ماتش وجدة

طمأن أنيس شاكو طبيب الوداد الرياضي جمهور الحمرا حول الحالة الصحية ديال اللعابا فالفريق قبل ماتش غدا السبت ضد مولودية وجدة فالجولة 7 من البطولة الإحترافية لكرة القدم، وأكد أن كل العناصر بخير بإستثناء 3 اللاعبين اللي كيخضعو للعلاج.
وكيتعلق الأمر بجلال الداودي اللي عندو إلتواء حاد فلاشوفي، ودازت سيمانا على الإصابة ديالو اللي كانت فماتش الحمرا وريفرز يونايتد النيجيري فالعصبة، وغادي يقدر يرجع يلعب حسب أنيس شاكو اللي تحدث فالصفحة الرسمية ديال الوداد، من هنا 2 سيمانات ولا 3.
الحالة الثانية حسب طبيب الودتد فهي ديال هشام أبو سفيان، اللي عندو تمدد عضلي فالفخذ ديالو وكيحتاج للراحة والعلاج ما بين 2 سيمانات حتى 3.
أمام زهير المترجي فأكد شاكو أنه فأخر مراحل الإعداد البدني باش يرجع يلعب مع الفرقة، من بعدما تصاب بإلتهاب حاد فالفخذ ديالو، وشدد طبيب الوداد على أن باقي اللعابا ديال الوداد كلهم بخير وبصحة جيدة.