حمد الله سد التعليقات على مشجعين هجمو عليه بسبب خروح المغرب من المونديال

قرر الدولي المغربي عبد الرزاق حمد الله يحيد التعليقات من الحساب ديالو فأنستغرام بسبب الهجوم اللي تعرض بعد نهاية ماتش المغرب وفرنسا فنصف نهائي كأس العالم قطر 2022، وهو الماتش اللي خسر فيه المنتخب الوطني بنتيجة 2 لزيرو وودع بها البطولة.
عبد الرزاق حمد الله من بعدما سالا الماتش واللي دخل فيه كاحتياطي تعرض لحملة انتقادات شرسة من مجموعة ديال المشجعين اللي داخلو لانستغرام ديالو وبداو كيعبرو على الغضب ديالهم فليكومونتير، وكاين اللي فيهم بدا كيتنمر عليه بسبب الفرصة اللي ضيع على المنتخب الوطني المغربي قدام مرمى المنتخب الفرنسي، واللي شافو بزاف ديال المغاربة أنه تعامل فيها بأنانية حيث كان يقدر يمرر لزكرياء أبو خلال أو شي لاعب آخر يماركيها وكانت تقدر تعدل النتيجة لو تسلجت، وهاد التعليقات ديال المشجعين المغاربة خلات حمد الله يسد التعليقات فالحساب ديالو.
للإشارة فعبد الرزاق حمد الله كان مطلب شعبي ديال الجمهور المغربي ومنذ سنوات، ولو أنه كان تحفظ من الجامعة الملكية المغربية لكرة القدم على العودة ديالو المنتخب وأيضا المدرب وليد الركراكي اللي ما كانش مقتنع به فالاول ولكن الجمهور المغربي بقى كيضغط حتى تم الاستدعاء ديالو المشاركة فكأس العالم قطر 2022، وشارك كاحتياطي ف 3 مباريات وساهم فصناعة هدف واحد للمنتخب الوطني المغربي كان ضد بلجيكا فالجولة الثانية من الدور الأول.