الفنان محمد الشوبي يفتح النار على بنكيران وإنتاجات"كوّر وعطي للعور"

في رسالة وجهها الممثل المغربي محمد الشوبي لموقع"أكورا"، اتهم هذا الأخير بنكيران بالتسبب في حرمان أولاده من عطلة قصيرة بعد انتهاء شهر رمضان الذي استنزف مدخراته بسبب موجة الغلاء. الشوبي تحدث عن دفاتر التحملات وغزة والعديد من المواضيع الأخرى في هذه الرسالة التي ننشرها لكم:
السياسة شادة فرمضان ورمضان مقطوع على الانتاجات التلفزية والتلفازة مقطوعة على غزة وغزة مفطرة الحكومة وهاد الشي كلو مطلع للشعب الدم ، كيفاش؟
1- السياسة مع بنكيران ماوقرات لا رمضان ولاغيرو ، وكتخرج فينا عينيها بالزيادات والله العظيم أنا لي كنت جامع شي باركة باش يسافروا أولادي فشي عطلة قصيرة من بعد رمضان ن لقيت راسي خرجت فيها وساليتها ، والخليفة عالله بقدر ما كانت القفة ديال رمضان شادة فيها الحكومة ومثقلاها علينا
2- ورمضان هاد العام جا محزوز على التلفزة ، وباغيها مع الصهد تخفف عليه ، ولكن خوات بيه وهو يتقطع عليها، خوات بيه حيت تسنات دفاتر التحملات لي ولات حمل ثقيل على جميع العاملين، وخوات بيه حيت أغلب الانتاجات عيقوا فيها ب"كوّر وعطي للعور" ، بلا مايديرو للما منين يدوز ويحافظوا على شعرة معاوية مع الشعب فهاد رمضان المقطوع ، كيبان ليا إلى بقات هاد الانتاجات محال يرجع رمضان العام الجاي ؟؟
3- التلفزة سمعات حتى هي غزة وهي تقطع حيت خسرات فلوس كثيرة كون غير خلاتها ونقلات غير الدمايات والبكا والنواح والتصريحات والتصريحات المضادة ، كيف قال السي بنكيران فمكالمة للسي العرايشي ، كن ربحوا هاد الفلوس وبكاو المغاربة وبردوا ليهم غدايدهم ، هاد المرة خص إسرائيل تنسق مع التلفزة المغربية قبل ماتضرب شي جهة ففلسطين باش يكون النقل مباشر وتكون المظاهرات كلها منقولة والحوارات ديال السي السفياني والسي وايحمان والعدل والإحسان فكل مكان
4- خصنا شي صالح كبير نرفعوا ليه الوعدة والموعودة باش يوقف معانا عند الله حيت الله سبحانه وتعالى محال واش باقي باغي يسمعنا، مع تحياتي.