زجل ..الموجة، عشيقة التّيه

موجة، مورى موجة كاتّرمى،
مبخترة أو حازنة، ياك آ جميلة القامة،
كون شفتي جفاني أو قلبي لَمريض،
أو رُعبي اللي قرّيتو فى المسيد،
ما بغى يفهمني مابغى يصغى،
كايعمل ديما غير اللي بغى.
الموجة مشات أو جات خلا ّتني حاير،
تايه فى هاد الفلك، بحال شي فلك ضاير،
ما عندو موخّ، ما عندو مصير،
أو الله اللي عارف، أو هو البصير،
أمّا حنا غير جرّة أو مزاج القدر،
بعادين، بعادين علينا النجوم أو القمر.
نعملوا اللي بغينا أو قدّينا عليه،
الموجة لينا بالمرصاد، ترمي لينا التّيه،
على كتافينا، على دراعنا أو على الرْجَل،
ما عمّرك تشتم ولا ّ تملّ،
قبل ما اتّمزّق، قبل ما تموت،
الموجة اللي كانت مغلّفة بالحوت.
قلبي هايج، أو صاحت فى وجهو الرّغوة،
صغير، عامت عليه، صفعاتو، خلا ّتو بلا دوى،
أو ها أنا أوقفت أو الخزّ أو عمّو تشعّب،
ما عرفتش واش نفرح، نطير ولا ّ انّدب،
على الليل أو النهار اللي داز أو معاه العمر،
فرحة، بهجة، جات أو مشات بحال التّمر،
اللي غرسناه أو كليناه بلا ما نشعروا،
هنا، لهيه، بقينا غير كانضوروا،
الله، الله على الموجة أو ابّاها،
فرحتي، حزني أو بكايا، كرهت اللي ربّاها،
أو معاها الغالية، النفيسة،
نياب بَتروني، ردّوني فريسة.
آ حييّاني، اللي إتيق بيك، فى الحين كاتغريه،
اللّوم ما كايرجع ليك، ولاكن غير ليه،
كايشوفك هازّة راسك أو تاجك كايگمگم،
يمشي، إخلّيك قبل ما يحجب عينيك الدمّ،
هادا، هادا هو المعقول اللي ما بغاش إسمع،
دنوبوا على راسو، ما ترحم، ما تشفع.