الإرهابي محمد العماري لي كان عنصر نشيط وخطير جدا ف "فريق الأحلام" ديال الإرهابيين لي فجرو الدارالبيضاء عام 2003 ولي ماكتابش ليه يفجر فندق فرح ولي محكوم بالمؤبد مقلق بززاف هاد الأيام..هو عايش هاني فالحبس ما خاصو حتى خير لي عطا الله عطاه دار الذنب وعتارف به ودابا كيدوز العقوبة بكل روح رياضية حيت الروح عزيزة عند الله ولكن واحد السيد فيه لفهامات و شبوقات مابغاش يخليه فالتيقار ومابغاش يعطيه تيساع. داكشي علاش محمد العماري طلب برمسيون ديال 48 ساعة باش يخرج من السجن في إطار زيارة خاصة..بطبيعة الحال إدارة السجن وافقات حيت الأمور تغيرات بزاف والدولة كتعاقب ولكن ماكتحقدش. غير خرج من الحبس( مؤقتا) محمد العماري مشا لدار والديه فدوار سكويلة..سبحان الله كولشي تبدل...البراكة ديال القصدير لي كان خلى ولات دار من 3 طبقات+ المكازة...الدوار مابقاش ولات سميتو حي السلام..اشمن طرقان...اشمن عمارات..رواج تجاري كبير..كولشي استافد من برنامج إعادة الإيواء لي دارتو الدولة وصرفات عليه ملايير الدراهم... كولشي خدا حقو و بالزايد..الإرهابيين، المسالمين، المستقيمين، المنحرفين المخلوضين، المعقولين، البزناسة..كيف قلنا الدولة كتعاقب و كتربي وأبدا ماكتحقدش على ولادها. محمد العماري منين شاف هاد التحول العمراني والاجتماعي الهائل حبس دموعو و قال مع راسو سبحان الله مشا دوار سكويلة و دوار طوما و جا حي السلام.. حنا درنا الإرهاب والدولة رجعات لينا الصرف بحي السلام... المهم محمد العماري خاصو مايضيعش الوقت ويستغل هاد 48 ساعة باش ينفد المهمة الخاصة. ماعندوش الغرض بوالديه وحبابو حيت ديما كيشوفهوم فاش كيزوروه فالحبس.عندو الغرض بهداك السيد لي داير ليه القوق فراسو. محمد العماري حسن لحيتو, نظف حالتو وصلى صلاتو وودع عائلاتو وتوكل على الله و نزل لوسط مدينة الدارالبيضاء..كولشي تبدل عليه ..ها tram ها طوبيسات جداد ها طرقان جداد...وصل حدا أوطيل الموحدين وقال فخاطرو بحسرة وندم ("ومن قتل نفسا فكأنما قتل الناس جميعا"...الله يسمح لينا) من بعد بقا غادي غادي حتى وصل للعنوان لي كانت فيه واحد الجريدة سميتها Le journal hebdomadaire وهو يقصد واحد الراجل كبير فالعمر لي هو لعساس ديال العمارة و سولو على واحد السيد سميتو بوبكر...العساس جاوبو قاليه هاد السيد كاااان خدام هنا وكان هو مول واحد "الجورنان" و ماكان خاصو خير و لكن طلع باندي ماكانش كيخلص لكريديات حتى تجمعو عليه بلمناير (بالملايير). ومنين سدو ليه الجورنان كولشي مشا خلا الخدامة و لماتريان (matériel) ودابا رآه هربان مرة تيقولو ف مريكان مرة ف فرنسا و مرة فسبانيا.."الحاصيل" رآه خاوي لبلاد. محمد العماري ما تسرطاتش ليه ضروري خاصو يتلاقى مع بوبكر... فطريقو للدار فحي سيدي مومن بان ليه واحد cyber وهو يدخل ليه بعد ما قال فخاطرو اللهم اغفر لنا اللهم اغفر لنا (حيت هاد cyber عندو واحد القصة مع تفركيع). العماري دار الأبحاث اللازمة فالأنترنت حتى لقى كولشي على بوبكر و مشى لواحد القهوة و عيط عليه فالتلفون. العماري: السلام عليكم ورحمة الله معاك محمد العماري ex-إرهابي ديال 2003 واش الصحفي سي بوبكر هذا؟ بوبكر: وعليكم السلام هو هذا بوبكر واش نتا نيت محمد العماري دير معايا appel video و قولي منين كتعيط لي. العماري: مرحبا.أنا كيف كتشوف جالس كنشرب قهوة فاوطيل الموحدين واش ممكن نشوفك بغيت نهضر معاك. بوبكر: اوطيل الموحدين؟؟خويا أنا معروف خواف ولي خاف نجا...خليك معايا غير فالتلفون..شفتك هاز sac à dos ياك لباس؟ العماري: ومنين نتا خواف و فيك غير الفم مالك أخويا كتجبدني قولي فين نجي عندك؟ بوبكر: أنا مكاينش فالمغرب.من بعد ما تشديتي نتا أنا وقعو ليا شي مشاكل خفت وهاجرت للخارج. العماري: فراسي كولشي.. الفرق بيني وبينك أنا ماقدرتش نفركع لوطيل ونهرب ولكن نتا فركعتي لبلاد بلكدوب و الجريدة بلكريديات وشردتي عباد الله وقدرتي تهرب. بوبكر: دابا نتا كتدوي معايا من برا يعني كيف قلت راك ستافدتي من العفو شفتي كلامي طلع صحيح ولكن هوما مارضاوش ودارو علي حملة. العماري: أخويا فمك كبير بلا قياس ومازال زايد فيه..شكون قاليك خديت العفو علاش باغي تاكل بيا طرف ديال الخبز بايت فين ما مشيتي كتجبدني علاش كتجبدني علاش. بوبكر: ولكن كيفاش دابا نتا ف الزنقة ياكما هربتي من الحبس و بغيتي دير شي مصيبة أنا دابا غادي نعيط لناس كبار فالدولة نشكم بيك. العماري: هههههه ناس كبار فالدولة؟ عاقو بيك من بكري مسموم و فيك غير الفم و طماع وكداب داكشي علاش ساسوك ..دابا حدك حد أبو عمر الألماني (الإرهابي حاجب) النهار كولو ونتا تمجد فيه. النهار لي غادي يشد فيه لملاير غادي يعينك عندو محاسب ياك نتا كوطابلي(comptable) خخخخخخ دير معاه شي مشروع وكول عاودتاني فلوس cnss ديال ألمانيا وسير هرب ل سبانيا عند علي عراس رآه حتى هو عندو شي بريكول ديال لكدوب ينفعك. بوبكر: دابا عافاك غير قولي راك ستافدتي من العفو باش ندير خدمتي را القضية عندي واقفة راني بغيت نطلع النيفو ضد المخزن. العماري: راك طلعتي النيفو بلا مخزن وغير فالخاوي ساليتي من العدلاويين ودزتي للإرهابيين. ها حاجب ها عراس غير أنا مانصلاحش ليك لا نتا لا داك عشيرك. بوبكر : عشيري؟؟ واش سي عبد المومني أنا كنعتارف على راسي خواف ولكن صاحبي عبد المومني حباس قديم و ماكيخافش عنداك تكون غالط. العماري: خخخخخخ هداك عبد المومني غير climatiseur كيخلعو عنداك تكون غالط فراسي كولشي. ياك هو مول شركة القروض لي كيقرض فيها عيالات الرجال. "أمانة" عليك سلم عليه وقوليه يعطيني تيساع. حنا فالحبس متبعين كولشي الماكلة الرياضة لقراية الصلاة وخبار شمايت الفاشلين بحالكوم. بوبكر: على أي حال أنا ماشي فاشل و ماعندي ما نخسر. فالمغرب ما عندي لا دار ولا فلوس ولا تجارة بحالي بحالك عايش نهار بنهارو. العماري: راك غالط يا لمسخوط أنا لي إرهابي و محكوم بالمؤبد عندي دار و عندي magaza وعندي تجارة الله يخلف على المخزن ما واكل فلوس cnss ما واكل فلوس ضرائب. بوبكر: أول مرة كنشوف حباس وكيشكر المخزن هادشي غادي نفضحو فالبرنامج ديالنا ( المغرب في أسبوع) غادي نجبدك غادي نجبدك حيت ما بقى عندي ما يتقال. العماري: برنامج "التهريج في أسبوع" خخخخخخ دايرين الضحك فراسكوم ناقصكوم غير الصحفي حاجب ديرو ليه بلاصة معاكم وبدلو سميت القناة..حيدو rifision و سميوها afghanision ومجدو كيف بغيتو فالإرهابيين ها حاجب ها عراس غير أنا عطيوني تيساع وبعدو مني. بوبكر : واخا واخا سي محمد مايكون غير خاطرك ولكن قولي شنو كونتي جايب لي فهداك sac à dos لي داير فظهرك رالخلعة مازال شاداني. العماري: لا والو غير فالحبس درت واحد التكوين مهني فالتبريد و وليت كنصاوب كليماتيزورات صغار قد تلفون portable بغيت نعطيه كادو ل سي عبد المومني باش فين ما مشا يديه معاه ومنين تجيه المراهقة المتأخرة و يبغي يقضي الغرض يحطو حداه ويخدمو وهو مرتاح بلا ما يبقى هاز عينيه فالكليماتيزور ديال سقف و يصدق محشم و ماداير والو مع .....الله ينزل عليه لمسخ. هنا العماري قطع التليفون على بوبكر و بوبكر بقى غير كيشوف كيفاش كولشي عايق بيهوم وحتى حاجة ما كتخبى...هذا غير حباس وشنو عارف عليهوم..خلاها حاجب القضية فيها إن..
