الكاف باغي لاليست ديال الفرق المشاركة فعصبة ابطال افريقيا وكاس الكاف واتحادات محلية كتطالبو بالتأجيل

كيواصل الاتحاد الافريقي لكرة القدم الارتجال فتسيير شؤون اللعبة بالقارة السمراء، وكيصحاب للمسؤولين ديالو ان الفرق والبطولات المحلية ما عندها حتى التزامات اخرى من غير انها ترديه ولو تكون قراراتو ارتجالية وبلا مواعيد مسبقة.
هذه المرة ناض الاتحاد الافريقي وراسل الاتحادات الوطنية والمحلية بالقارةً الافريقية، وقالهم أن اخر موعد باش يعطيوه لاليست ديال الفرق اللي غتلعب دوري ابطال افريقيا وكأس الكونفدرالية هو يوم 30 يونيو الحالي.
ارتجالية الكاف حطت مرة اخرى الاتحادات الوطنية فمواقف محرجة مع الفرق والجماهير ديالها، حيث عدد من المسابقات المحلية مازال ما سالات باش يتعرفو الفرق اللي غيلعبو منها فعصبة أبطال افريقيا وكاس الكاف، ومن بنها المغرب اللي يالاه تعرف ان الجيش الملكي والوداد والفتح اللي غيلعبو فلافريك العام الجاي، ومازال الممثل الرابع للمغرب اللي غيلعب فكاس الكاف ما تعرفش حيث هو اللي عادة فالسنوات الماضية كيكون بطل كاس العرش، وهذه المسابقة يالاه وصلنا لنصف النهائي ديالها.
وفنفس الموضوع، كشف موقع "في لكول" المصري القريب من الكاف، بلي الاخير تلقى طلبات من عدد ديال الاتحادات الوطنية باش يأخر موعد اخر اجل لتقديم لائحة الفرق المشاركة فعصبة ابطال افريقيا وكاس الكاف.