التضامن اللي كيجيب لملاير. شوفو الفرق بين هشام لحريزي اللي كيذبح يوميا 12 حولي وحتى حد ما كيعرفو وميمي طاق طاق وأخواتها اللي شوهات الناس وكتجمع لفلوس على ظهرهم وكيفاش السلطات متواطئة مع وحدة كتصور الاطفال

الزلزال كيما كان كارثة حلات على ساكنة المناطق المتضررة، كان كارثة على مواقع التواصل الاجتماعي اللي بينات خبث هاد اللي كيسميو راسهم مؤثرين، واستغلالهم لمآسي وظروف الناس الصعبة.
من بينهم واحد المؤثرة اللي كتقول على راسها أنها مسطية وماشي نورمال سميتها ميمي طاق طاق، هاد ميمي طاق طاق واللي معروف أنها ديما كتمشي للمناطق القروية وتبرع للساكنة ديالها، دخلات فواحد الحالة ديال كل دقيقة تصويرة للناس اللي كتعاون.
المشكلة هو أن المغاربة اللي اعتبروا أن باقي المؤثرين خاص يتحاسبو على استغلال الناس، وصلو لهاد ميمي وقاليك لا من حقها لأنها كتعرف الناس، منطق غبي د ناس مفاهمينش أن أي صور وأي استغلال للناس فمرحلة حرجة وصعبة، هو إهانة ليهم وكيضرهم.
ميمكنش شخص فوضعية صعبة يقوليك لا متصورنيش، هو مرفوع وبالو مع المشاكل ديالو، وكتجي تصورو ونزيد عليه، وتسحقو بالتعالي ديالك، والمؤثرين كاملين مسؤولين على هاد الكارثة وتا الدولة اللي خلاتهم يمشيو تما وكانتش حازمة فالتصرف معاهم.
را المغرب كولو محسنين اللي ساهمو فهاد الأزمة بشكل فعال، وتا واحد فيهم ممشى صور دوك الناس، واش ميقدروش المؤثرين مثلا يعاونو من بعيد بلا ميصورو؟ لا طبعا حيت الانتهازية اللي فيهم مكتخليهمش يبقاو بلا تصوير.
قارنو بين هاد ميمي اللي شي وحدين مرجعينها شي حاجة بغباء كبير وبين المحسن هشام اللي من اولاد حريز. هاد الاخير كيدبح يوميا ما بين 10 و12 حولي وجات تريتور وكيصايب الخبر وحتى ماكينة القهوى لكبيرة جابوها. واحد ما كيعرفو حد. ما كيبغيش حتى يهدر على راسو والثانية ميمي للي كتاجر بتصاور الاطفال ومآسي الحوز ومخلياها السلطات ما تابعاتها ما والو. وحدة كتصور باش تربح. كتخسر درهم باش ترجع عشرة والثاني كيخسر بكرم حاتمي فقضية نبيلة. كيضامن من قلبو مع بلادو.