المسؤول على مركز الدكتوراه لي باغين يديروه عميد FST فسطات مقربلها مع كلشي.. أساتذة حطو شكايات اطلعات عليها "گود" وآلاف الطلبة مشى عليهم التسجيل فالماستر والدكتوراه بسبب إشاعة "الرقمنة" فجامعة الحسن الأول

بنشرقي ماشي الكوايري ديال الوداد، هذا كوايري من نوع آخر كيكور بنادم ويصيفطو فحالو، أستاذ فكلية العلوم والتقنيات بسطات واللي كيوجد فيه عبد اللطيف الميراوي وزير التعليم العالي والبحث العلمي والابتكار باش يديرو يا عميد ديال fst يا مدير ديال معهد علوم الرياضة، أواه السيد مكلاسي فگاع لي كونكور لي مدوز ديال لي پوسط واخا المرشحين ضدو عندهم نقط اكثر منو.
إطلع "گود" على شكايات أساتذة فالقانون العام والخاص لقاو روسهم فورطة بسباب هاد المسؤول لي داير ليهم موقع إلكتروني بالتشاور مع رئيس الجامعة هاد الموقع ما خدامش ليهم بغاو يحطو مواضيع التأطير باش يدفعو الطلبة عياو ميديرو في الشكايات ويعيطو لعبد اللطيف مكرم رئيس الجامعة والو ذاك الشي باقي فبلاصتو.
مصيبة اخرى استقاتها "گود" اليوم من خلال تواجد موفديها فجامعة الحسن الأول بسطات ان عدد كبير من الطلبة لي باغين يكملو دكتوراه لقاو الموقع الإلكتروني مخدامش وعياو معه ودابا الوقت كيدوز وكاين اللي كيقول انها مقصودة باش ميسجلوش الناس.
حتى طلبة الماستر فكلية العلوم القانونية والسياسية لقاو موقع الماستر ما خدامش ودابا راه مستقبلهم غادي يضيع.
اللي ممفهومش هو علاش رئيس الجامعة كينفي علاقتو بهاد بنشرقي وملغاش نتائج الكونكور واخا "گود" توصلات بالتسريبات ونشرات اللائحة قبل ب24 ساعة على انعقاد مجلس الجامعة.