ودابا النيابة العامة حصلات وكازا تقدر تقلب. مع اعلان سيدنا منح المغرب مع الصبليون والبرتغال مونديال 2030. الويننرز لهادوك اللي كيتاهمو الحمرا: ها حنا بلغنا ما تلومو الا ريوسكم

استعراض كبير للوينرز دابا فكازا. كلشي منظم بطريقة احترافية. فصائل مكونة للوينرز فاكثر من بلاصة فكازا جاية على رجليها لمركب محمد الخامس للي فيه ماتش هاد العشية بين الوداد والزمامرة مع الستة ونص دالعشية برسم البطولة الاحترافية.
وليدات الوينرز هازين شعارات الحمرا فاهم شوارع كازا فلوحات احتفالية. كيرددو الشعارات ديال النادي العريق. اسلوب احتفالي قوي بزاف. بدات الميساجات القوية.
هادي رسالة علاش داروها الوينرز؟ حقاش حسو باللي ناديهم مستهدف. هادي اكثر من اشهر ولخبار كدور على الاستماع لرئيس النادي سعيد الناصري وربط هاد الشي باكبر مهرب للكوكايين فافريقيا اللي سميتو المالي. امو مغربية وباه من مالي.
جمهور الحمرا شاف اهانة النادي وصمت رئاسة النيابة العامة فهاد الموضوع. شاف صمت الدولة فهاد الموضوع وخلات صحف وصحافيين كل نهار كيخرجو اخبارات على اعتقال او اتهام وديما مدخلين الحمرا.
البارح كان منعطف اخر. اتهام صريح للحمرا والنيابة العامة ساكتة.
جمهور الحمرا كيبان ليه باللي الهدف هو يقضيو علي هاد النادي. هاد القضية كتبدا بنشر اخبار كاذبة. فايك. من بعد يدوزو لمرحلة اخطر
دابا هادي رسالة للدولة بكل اجهزتها من كل محبي الحمرا خاصة الوينرز٬ مفادها: الحمرا خط احمر. اللي قرب منها يضربو الضو.
رسالة جات مع رسالة للديوان الملكي فيها قال محمد السادس باللي مونديال 2030 غادي يكون فالمغرب مع اسبانيا والبرتغال.
علي هاد الرسالة خاص الوضوح. كلشي خاصو يخلص الى خالف القانون. اللي دار الذنب يستاهل العقوبة. غير هو خاص الشفافية. خاص لمغاربة يعرفو اش وقع.
النيابة العامة قادرة باش كازا ما تقلبش. خاصها تخرج تقول موقفها. حتى واحد ما فوق القانون ولكن خاص الشفافية. خاص معاقبة كل واحد كيصب الزيت فوق العافية باش يدير البوز. راه كلشي باين للدولة وتحرك قبل ما يفوت الفوت