الرجاء غيستانفو احكام بالملايين على الفريق لصالح حركاس وحافيظي

غيستنفو الرجاء الرياضي الأحكام الصادرة من غرفة النزاعات ديال العصبة الوطنية الاحترافية لكرة القدم، واللي حكمت لجمال حركاس وعبد الاله حفيظي ضد الفريق بالملايين.
وقرر المكتب المديري للرجاء الرياضي يقدم استئناف بخصوص الحكم الصادر عليه بتأدية مبلغ 160 مليون سنتيم للاعب السابق للفريق جمال حركاس، و 200 مليون سنتيم للاعب السابق للفريق عبد الاله حفيظي، حيث كانوا توجهو لغرفة النزاعات بسبب المستحقات اللي كيتسالهوها للنادي.
وباغيين الرجاء الرياضي يستانفو الأحكام الصادرة فحق الفريق، مع العلم ان جمال حركاس هو اللي فسخ العقد ديالو عند العصبة الوطنية الاحترافية حيث ما بغاش ياخد الفلوس ديالو مقسمة طرونشات، وعبد الاله حافيظي سالا العقد ديالو وما بغاوش الرجاء يحددو معه ومشى سنا مع المغرب التطواني.