واش بانت ليهم غير إمسوان وتيفنيت؟ انتقادات كبيرة للسلطة فسوس لي هدمات ديور الدراوش فوق الملك البحري وخلاو الملايرية دايرين مابغاو (تصاور)

السلطة الولائية فأكادير مع الوالي الجديد سعيد أمزازي لي باقي كاع مازال ماسخن بلاصتو كوالي لجهة سوس ماسة بان عيبو فأول قرار لي متعلق بالهدم ديال الديور لي كايحتلو الملك البحري.
الهدم بدا هادي أسابيع فاشتوكة وبالضبط قرية الصيادين تيفنيت لي دار البوز فمواقع التواصل الاجتماعي بعد مفاجأة المواطنين والسياح القاطنين بالطراكسات، والجمعة للي فاتت، كانت التتمة ديال عملية الهدم فإمسوان شمال أكادير.
مصادر "كود" من فعاليات محلية قالت إن عملية هدم البنايات لي محتلة الملك البحري مزيانة ولكن خصها تكون كاتشمل كولشي ماشي غير الدراوش فعلى سبيل المثال كاينين بنايات ومطاعم ف ايمي وادار محتلين الملك البحري ومدخلين فلوس صحيحة ولكن الوالي ماقررش يريبهوم حيث ديال ملايرية معروفين فأكادير يقول مصدر "كود".
مصدر "كود" أكد أن احتلال الملك البحري والملك العمومي فأكادير كاين غير حدا الولاية ديال جهة سوس ماسة خصوصا فالمنطقة السياحية ولكن الولاية ماشافتش جيهتهم.