كاين لي كيظن أن المغرب المنسي هو بوعرفة وأگدز وتازمانازت راه غير عين السمن وسط فاس مغرب منسي أكثر مرفق عمومي حداثة ورقمنة في المنطقة كلها هو السطافيط لي واقفة قبالت كوميسارية الوفاق

كاين لي كيمشي حتى لنواحي ايملشيل باش يصور شي دوار غير في الخلا ويكتب عليه المغرب المنسي، بينما گاع متحتاج تضرب هاديك الطريق كلها وسط الجبال والفيراجات آجي غير لعين السمن بفاس وغادي تلقى المغرب المنسي غير حداك وسط المدينة، ايملشيل راه قادو ليها طريق مزفتة حرير على ارتفاع 2645 متر دايز الگودرون نيلو، بينما قبالت إقامة الزهور جنب شارع محمد السادس باقا الطريق پيست كاع موصلها الزفت، أكثر مرفق عمومي حداثة ورقمنة في المنطقة الإدارية لعين السمن هو السطافيط لي واقفة قبالت مفوضية الشرطة الوفاق، من خلال هاديك السطافيط كتعرف المغرب غادي بسرعتين ومكسيري في المركز وواقف بلاصتو في الهامش، ومرة مرة كيوصلو التشاش ديال الحضارة بحال هاد السطافيط.
بالنسبة بدائرة أمنية بحجم المنطقة الرابعة في فاس لي ربما هي اكبر منطقة في المدينة من ناحية الجغرافية، راه من غير المعقول تكون باقا المفرضية عبارة على دار قديمة من طابقين قبالة سوق عشوائي خاص تبقى تسول عليها باش تلقاها وفاش كتلقاها مكتعرفها واش مقاطعة قديمة ولا مفوضية امنية، علما راه كيتبعوا ليها احياء كثيرة وفيها كثافة سكانية، فاش كنت ساكن في طريق عين الشقف كنت تابع إداريا ليها وتحولت لشارع محمد السادس وباقي تابع إداريا ليها وراه مشات هكاك حتى للاحياء الجديدة في طريق عين الشقف وكتجمع كاع الفئات الاجتماعية ها احياء الفيلات وعلية القوم ها العشوائي ها عين السمن نيت، انا الصراحة عمري تخايلت غادي نشوف دار قديمة وصغيرة كاراج وجوج طبقات خاص يخدمو كثر من مية شهادة سكنى في النهار عاد زيد عليها المهام الأمنية الأخرى ها لي جا يشكي ها لي شدوه وكيعمرو ليه وهادشي كلو في دار صغيرة في حومة شعبية قبالت سوق عشوائي وربما بأقل عدد ديال الموظفين.
في أواخر التسعينات وبداية الالفينات كانت واحد الكوميسارية في بنسودة في واحد الدار على الشارع، ومكان فيها والو وبنسودة كلها مكان فيها والو غير الغيس ومعزولة على المدينة حتى الواد الحار مكانش داك الساعة الديور كانوا قبالتهم غير الحفاري هادشي راه غير تالهنا وهنا، دابا عندهم كوميسارية كبيرة بينما مفوضية الوفاق لي جغرافيا وديمغرافيا قد مدينة صغيرة خدامين من دار صغيرة في حي شعبي، ولسخرية القدر هاد المنطقة كلها تابعة ليهم مثلا انا في جنب شارع محمد السادس ولادية الامن غير حدايا ، لا خاص نسافر في الطريق وعبر الزمن لبنسودة الى حتاجيت شي حاجة نديكلاري او نخرج لاكارط نيت، بينما منطقة الوفاق كلها ولي غادي تلقى الساكنة ديالها فايتة مدن صغيرة واقاليم بحال تينغير مثلا او شفشاون ومع، مادام أن كوميساريات الامن الوطني كيقدمو حتى خدمات إدارية فعلى الأقل يكونوا في بنايات كتوفر فيها شروط العمل الأمني والإداري، مايمكنش دار صغيرة كتقدم خدمات لثلت مدينة كبيرة بحال فاس وبلا حتى تجهيزات او إمكانيات وفي غرف صغيرة وطوابق عامرة بالمرتفقين مكاينش حتى منين تدوز او كيفاش تحرك، راه هذا مغرب منسي وسط المغرب بلا مايحتاج يكون في الأطراف.