رحيمي واخا ربح كريستيانو والنصر بكا.. كال أن بزافت الحوايج خلاو دموعو يطيحو

بكا النجم المغربي سفيان رحيمي بعدما تألق مع العين الإماراتي فربع نهائي دوري أبطال آسيا، ضد النصر السعودي بكريستيانو والنجوم ديالو، وقاد فريقو لدومي فينال المسابقة.
وغلباتو دموعو ملي كان كيعطي تصريح صحافي بعد هاد القمة الكروية، ولي كال فيه بأن الرباح فالماتش ضد النصر كيتعتبر رباح له هو كسفيان رحيمي قبل كلشي، ثم شكر المغاربة اللي كانو ديما كيشجعوه وثايقين فيه.
وأضاف رحيمي، اللي ماركا فهاد الماتش 2 بيوتا، "أول حاجة الحمد لله ما عنديش كلمات نوصف بهم الشعور ديالي، الحمد لله هذا الرباح هو رباح ليا أنا بشكل خاص.. وكنشكر صحابي على القتالية ديالهم وكنشكر الجمهور العيناوي اللي حضر، وقبل الماتش جانا اتصال من الشيخ محمد بن زايد اللي اليوم عيد ميلادو وأفضل هدية له هي هذا الرباح".
وملي سولو صحافي أبوظبي الرياضية على شنو اللي مخلي دموعو ينزلو، كان جواب النجم السابق للرجاء، "بزاف ديال الحوايج... والحمد لله فريق العين والجماهير المغربية عطاوني الثقة باش نحضر فهاد الماتشات الكبار وشكرا لكل اللي دار ثقتو فسفيان ومازال الخير إنشاء الله".