الخواسر.. ديال الانتخابات. هادو هما أبرز المكردعين والمنتصرين من الشخصيات الحزبية والسياسية بعد الانتخابات الجماعية والجهوية 1/2

أسفرت النتائج النهائية للانتخابات الجماعية والجهوية ل 4 شتنبر عن مفاجأت عديدة، ولعل أبرزها بعد اكتساح البيجيدي للمقاعد المخصصة للمدن الكبرى، هي التكرديعة الكبيرة التي مني بها زعماء أحزاب وازنة.
الخواسر.. ديال الانتخابات

شباط.. دعاوي البيجيدي خرجو فيه
التكريعة الكبيرة كانت من نصيب الأمين العام لحزب الاستقلال حميد شباط، اللي لقا راسو من عمدة فاس ولى غير مستشار جماعي عادي بالمجلس اللي سيطر عليه سنوات. الطامة الكبرى هي هاذ الشي وقع في مدينة تعتبر خزان انتخابي تاريخي لحزب "سيدي علال". دابا تيار لا هوادة غادي يتشفى فيه مزيان، حيث كان الناس المحسوبين عليه تكردعو كاملين، بحال غلاب وياسمينة بادو..
الباكوري.. حلم رئاسة الجهة باي باي
الأمين العام ديال البام حتا هو لقا راسو خارج اللعبة، رغم وضعه ترشيحه بمدينته الأم. المحمدية ما عقلاتش عليه، حيث يالله بان فيها والناس مكيعرفوهش مزيان.
كان حلمه باش لائحته الجهوية تكتسح المقاعد الجهوية، لكن للأسف لقا راسو بحال شباط. أمين عام ديال حزب كبير ومقدرش يفرض راسو انتخابيا.
ساجد.. نوض ساعتك سالات
بزاف ديال الناس اللي استمعو الخطاب ديال الملك اللي تكلم فيه على كازا، كانوا عارفين راه ساعة ساجد جاية جاية وراه مغاديش يطول في بلاصته، حيث المدينة الغول كسبات معركتها ضده ومابقاش قادر عليها. ضروري ساجد غادي يبقا فيه الحال، ودابا عندو الوقت الكافي باش يتفرغ لإعادة هيكلة حزب الاتحاد الدستوري اللي هو الأمين العام ديالو. باش يحضر للانتخابات التشريعية على خاطرو.
بنشماس.. ما ضامش مع الرباح
حكيم بنشماس الناطق الرسمي باسم البام، واللي رشحو الحزب من أجل التنافس على رئاسة جهة الرباط سلا القنيطرة، عاش كابوس خايب ليلة الجمعة، مني عرف راه البيجيدي اكتسح انتخابيا مقاطعات القنيطرة، حيث فهم هذيك الساعة راه حتا مقاعد الجهة غادي يديرو ليهم ميسا. وهذاك الشي اللي كان. البيجيدي ربح 26 مقعد، أما البام فكان من نصيبه 13 مقعدا.

مباركة بوعيدة.. باركا عليك الوزارة
مباركة بوعيدة كان كتحلم باش تكون أول رئيسة جهة في مغرب ما بعد دستور 2011، لكن الاتحاديين معلقوش عليا وربحو 12 مقعد بجهة كلميم واد نون. القضية غادي تكون صعيبة عليها حيث أحزاب الأغلبية عندها 15 مقعد. اما احزاب المعارضة ففازت ب 22 مقعد. إذن معندهاش أمل باش تحقق حلمها في رئاسة جهة الجدود ديالها.
خويا منصف.. اسمح لينا معقلوش عليك
خويا منصف هاذ الشي اللي عطا الله. البيجيدي دار ما بغا في كازا، وخاصة في مقاطعات الطبقة المتوسطة اللي ولى عزيز عليهم الهضرة ديال بنكيران. كنتي خايف من نبيلة ولكن خرجو ليك الخوانجية من الجنب وعلى الأقل راك دزتي ودوزتي معاك جوج ديال خياتنا. مبروك عليك الصفة الجديدة : عضو مجلس مقاطعة سيدي بليوط.
ياسمينة بادو.. مشات ليها مقاطعة أنفا
الاكيد أن فاجعة بوركون كان ليها دور كبير باش الناس يقلبو على حزب الاستقلال والممثلة ديالو بتراب المقاطعة ياسمينة بادو اللي كانت رئيسة المقاطعة. تنافست ياسمينة بادو، وكيلة لائحة حزب الاستقلال بأنفا، مع حنان رحاب، وكيلة لائحة حزب الاتحاد الاشتراكي بالمقاطعة ذاتها. لكن الكلمة الاخيرة كانت عاوتاني للبيجيدي. بادو دوزات معاها 5 مقاعد في مجلس مقاطعتها التي ترأستها منذ عام 2003.
غلاب.. هاذي سباتة جديدة
من بين أبزر "المكردعين" في الدارالبيضاء بعد ساجد غادي نلقاو كريم غلاب، القيادي الاستقلالي ووزير التجهيز ورئيس مجلس النواب سابقا. غلاب ما قدرش يحقق الحلم نتاعو في الفوز بمنصب رئيس جهة الدار البيضاء وعضوية مجلس المدينة. غلاب جاب مقعد واحد في مقاطعة سباتة اللي قلبات عليها وجهها هاذ المرة لفائدة البيجيدي.
الدويري.. وتقول مقعد واحد آصاحبي
الاستقلالي فؤاد الدويري، وزير الطاقة والمعادن والماء والبيئة في حكومة بنكيران الأولى، حتا هو مسكين ما قدر يربح لا بعضوية بمجلس مقاطعة أنفا ولا بعضوية مجلس جهة الدار البيضاء سطات. البركة ديال شباط وقفات معاه مزيان في كازا.
نبيلة منيب.. زعيمة يسارية في زمن أغبر
راه رغم النوايا الحسنة ديالك والحملة الانتخابية النظيفة اللي عملتي هاذ الشي اللي عطا الله، حيث كازا ما بقاتش هذيك المدينة العمالية الثائرة. كلشي فيها تبدل وولات مدينة جامدة نكارة للخير وما كتعطي غير البراني..
فتيحة العيادي.. كن بقيت غير في ابن جرير
حفيدة القايد العيادي خلات بلاد بوها وجدودها وجات حتا هي بغات تجرب حظها في دائرة الموت بكازا. هذاك الشي علاش اختارت باش تكون وكيلة حزب الأصالة و المعاصرة بلائحة النساء للجهة بعمالة أنفا عن جهة الدار البيضاء – سطات. لكن للأسف الوصفة الانتخابية الجديدة ما صدقاتش.