الرحيل دمعة مسافرة الحلقة الرابعة

—
خلّيونيى أرّجع ألألمي! لزّموا عليّا نحفض 3000 شطر بلغة ما عمّرني سمعت من قبل، أو إيلا سمّاوها "الجاهْلة"، ولا ّ، إيلا ما خفتش نكدب "الجاهلية"، ما كدبوش. هاد اللغة ما كان عندها حتى شي علاقة بالواقع، أو اللي ختارها ميا فى الميا ما كانش ساحي، أو بغا غير يلْهينا ياك ما أطّيح عليه شي فكرة "حْسن من هادي"، العام كولّو أو أنا كانخمّم فى الفضل ديال هاد الشعر الغريب، أو إيلا ما قريناهش، شنو كاع غادي يطرا؟ تزهق الكرة الأرضية من بلاصتها؟ ولاكن كونت متأكد أن اللي طاحت عليه هاد الفكرة تعمّد إعدّبنا أو إسمّم مخّنا الفتي، أو كاندكّر ديما فى هاد السياق قولة ْ أمير شعراء الألمان "كوت" لمّا قال: "اللي ما عمّرو كلا خبزو أو هو كايبكي، ما عْرف بحق الدنيا، ما ادّى ليها غاية"، واك، واك آ عباد الله، واش بغينا نخرجوا حنا كولّنا شعراء؟ فى هاد البلاد ما كاينش اللي ما عمّرو بكّاه حدّ آخور، أو كون ما كانبغيوش البكى أو الدموع، ما نسلّموش راسنا ألّما من جديد، ألّبحر أو الحوت اللي ضاربين معاه ميعاد فى "بين بين"، بين سبانيا، فرانسا، ألمانيا اللي سلبوا لينا العقل أو ضنّينا الجنة فوق الأرض، فاين الحليب كايجري فى بزابز مدهّبة أو العسل الحرّ غير كايتفرّق بالسطولة، اللهما قطران بلادي، ولا عسولات الناس، عاد أنّسى حسبي أو نسبي أو نخدم ثقافة الغير.
ما خلا ّوْا علاش تكلموا هاد الشعراء غرابين الأطوار أو الطقوس، على جَمال ما عندومْتيل، حب فتّاك، كلاب مسعورة، خْيولة هايجة، صارطة صمت مغلّف بالقيل أو القال حتى على اللسان تقال، شعروا على الدّم اللي كايجري فى العروق، حتى أتّنفخ الرّابوز، أتّغنّاوْا بهاد الغلام غير باش ما ينساوش لاخور بحال إيلا كانعرفوهم من شحال هادي أو كانتصارفوا معاهم يوميا: "يلا ّه هاك أو أرى". كونت كانتعجّب كيفاش هاد الشي يمكن يحصل فى بلاد إسلامية، فى "بْروديسْتان"، كانت كاتحيّرني هاد الأبيات الشعرية إيلا خصّني نعرضها بالجهر فى القسم، أكيد كان فيه الدّغول هاد أوزير "التّرابي" اللي شرف على هاد المقرر. الملجأ الوحيد اللي كان عندي هو نحفض أو نسرط بلا ما نمضغ، أو إيلا سوّلني مول السلعة، "مول العروبية"، كانردّ ليه سلعتو باقية "ضوبل في"، ولا خديشة وحدة فيها. أو أكيد كان القسم كولّو كايشاركني هاد المصير، أو يكدب عليك إيلا أدّعى شي حدّ منّا أنه كايفهم شنو حفض، أو إيلا زغبوا الشيطان أو زعم أن اللي تفوه بيه مفهوم أو مفضوح، كونّا على يقين أن الريح بدا كاينوب على مخّو أو زوّدو بشفاه كدّابة.