الياس العماري و20 فبراير والادمان. بحكم معرفتي بمؤسسيها راه حالة الإحباط هي الدافع لتأسيسها وماشي تصابوا بيها من بعد وهذا سباب ادمان بعضهم المخدرات واخا شي نخارط فالبام بقا مبلي حتى بالمسوس وبماكلة رزق عباد الله

هو الصراحة غي بمجرد أن تفكر تدير حراك من أجل الإصلاح فالمغرب فهذا فحد ذاتو نوع من العته والخبل والمرض النفسي، ومايمكن يفكر بحال هاكة إلا مدمن مخدرات أو شي واحد كيعاني من الكآبة ، وبحكم أنني كنت من المؤسسين ديال عشرين فبراير ومن معتقلي الرأي بسبب هاد الحركة ، ومن الأفراد لي خلقوا النواة الأولى فكنأكد ماجاء به سي إلياس حينما قال أن البام أنقذ شباب عشرين فبراير من حالة الضياع واليأس وإدمان المخدرات بإستقطابهم اليه ، حيث بحكم معرفتي بالمؤسسين واحد واحد ومن بعد حتى بمن ركبوا على الموجة وأصبحوا رموزها ، كنأكد أن حالة الإحباط عندهم كانت هي الدافع لتأسيس الحركة أصلا ، وماشي تصابوا بيها من بعد ، وهذا سباب ادمان بعض منهم المخدرات ، واخا البعض منهم واخا نخارط فالبام بقا مبلي بالمخدرات وبالمسوس حتى هو ، وبماكلة رزق عباد الله.
هاد التصريح لي صدر على سي إلياس ، ولي تلقفه شباب عشرين فبراير وهم ينظرون الى بعضهم البعض بنظرات اتهام للآخر كأن كل فرد فيهم ليس هو المعني ، في جحود تام للأبوية التي منحها لهم حزب التراكتور ، حيث تقبلهم في صفوفه ليس لأهليتهم ، ولكن كفعل خيري من باب انقاذ الشباب الضائع ، واخا أغلبهم كان دائما يردد علينا ، أن شحال من حزب جا عندهم وعرضوا عليهم يديروهم على رأس لائحة الشباب ولكنهم مابغاوش ، فاللخر صدقوا دخلوا غي من باب الشفقة.
لكن ما حز في نفسي أكثر أنه فالوقت لي كنت كناكل الرافسة وكنعس فلاكار ، وكندوش بالما بارد والثلج كيطيح فحبس أزيلال ، كان سي الياس كيستقطب العشرينيين لإنقاذهم من الضياع ، وملي خرجت لقيت البلايص سالاو ، وبقيت ضايع رغم أنني مناضل صنديد من مناضلي الكلمة ( القرنابي )، وحتى ملي مشيت لمؤسسة محمد السادس لإعادة الإدماج وقتليهم راه بغيت نندامج قالولي نقدرو ندبروليك فتريبورتور ، وأنا نجمع الوقفة حيث مابغيتش نجبد العيب مع خالد الشرادي ، ولحد الآن لزلت مدمنا على الطاسة أما الزطلة عفا الله ولات عندي فوبيا منها كاع غي كنشدها فيدي وكنتفكر المينوط
ومن ناحية الضياع كنحس بيه من نهار تزاديت فهاد البلاد حيث كنعتابر سيدي ربي بغا يجلوقني هنا زكارة ، من ناحية اليأس يائس من رحمة الله ، ولكن كلي أمل فحزب البام بأنه ينتاشلني من هادشي كيما دار مع باقي الشلة ، ومكنطلبش من سي الياس شي عمود فآخر ساعة ، أو شي كشك على البحر نبيع فيه قرعة ديال سيدي علي الصغيرة ب 8 دراهم ، وحتى كشيك ( تصغير كشك)، ومكنطلبش أنني ندخل لمركز معالجة الإدمان التابع للحزب ديالكم، كا ما أطلب هو ترد لينا الدراري حيث راه الشارع المغربي يفتقدهم ، فراه لايعقل أن حزبكم يسرط كولشي، اسلاميين، يساريين، مدمني مخدرات، أعيان، نخبة مثقفة ، رجال أعمال ، راه مخليتي لينا والو ، رد لينا الدراري راه كنا مدوزين معاهم وقيت ، راه تفتقدهم المقاهي والحانات التي كانوا يرتادونها ، ويفتقدهم أمين البارودي لي بقوة الشوق ليهم وللى كيحس بفراغ قرر معاه أنه يولي كيحارب الجريمة على غرار سبيدرمان وباطمان وباقي الأبطال الخارقين ، رد لينا الدراري راه بلاصتهم أمام البرلمان وماشي وراء المكاتب راه كيتخنقوا وكتقللال المنتوجية ديالهم ، رد لينا الدراري باش نبقاو نميزو فهاد البلاد بين الصحفي وبين العشريني الذي تصوحف ، رد لينا الدراري راه البعض منهم ملي تعالج من الإدمان وللى كيبانليه بنكيران رمز للإنتقال الديمقراطي فالمغرب ، رد لينا الدراري راه حميد زيد قريب يتشرد بحكم أن كتاب الرأي أصبحوا أكثر من القراء أنفسهم ، رد لينا الدراري راه الشارع بلا بيهم خاوي.