درس وصافي: واش الخارجية غير خربقاتها مع هولندا. ردهم درس لينا: قانوننا يحمي الافراد من سلطة الدولة. بغات تقول للمغرب ايلى ما عندكمش قانون يحمي الافراد منكم شغلكم ما تعطيوناش دروس

رد الخارجية الهولندية اللي دارتو مع وزارة العدل ديالهم درس كبير لينا على بيان الخارجية المغربية درس كبير لينا. بالمختصر المفيد قالو لينا "حنا القانون يحمي الافراد من سلطة الدولة" وانتوما ايلى ما عندكمش احترام لحرية الافراد من سلطة دولتكم ما تعطيوناش دروس. هاد الشي علاش فالبيان نفسه قالو راه بيانكم "مبهم" و"غير مرغوب فيه" وسحب السفير تخربيقة وصافي.
هاد الشي جا على ود سعيد شعو البرلماني المغربي السابق اللي عندو الجنسية الهولندية وعايش فهولندا وعندو حركة تطالب باستقلال الريف. وهاد الشي عندو علاقة بالحراك. حقاش البيان المغربي قال ان الاتصالات "تمحورت حول ممارسات مهرب مخدرات معروف من أصل مغربي مقيم في هولاندا". واضاف البيان ان "هذا المهرب المعروف كان موضوع مذكرتي بحث دوليتين أصدرتها في حقه العدالة المغربية، لتكوينه عصابة إجرامية منذ 2010، والتهريب الدولي للمخدارت منذ سنة 2015" وان السلطات المغربية مدت نظيرتها الهولندية "منذ عدة أشهر، بمعلومات دقيقة تفيد بتورط هذا المهرب في تمويل وتقديم الدعم اللوجستي لبعض الأوساط في شمال المغرب، مسجلا أن المغرب الذي، وبطلب ملح من الاتحاد الأوروبي وهولندا، ما فتىء يتعاون بإخلاص في مجال مكافحة تهريب المخدرات، لن يسمح بأن يعمل، مهرب معروف تمكن من تجفيف موارده، على إعادة خلق ظروف ملائمة لأنشطته الاجرامية".
وهاد الجملة قلقات الهولنديين "تم إبلاغ السلطات الهولندية وبوضوح بأنه يتعين اتخاذ تدابير ملموسة وعاجلة ضد هذا المهرب الذي يرتزق من الاضطرابات". كيفاش بوضوح. واش هادا اللي دار بيان الخارجية ما عارفش هولندا ما عارفش قوانينها. كاع اوربا فيها معارضين كيسبو الملكية وكيدعمو كل واحد من مكانو النظام اللي بغاو. علاش جا البيان مباشرة بعد فيديو شعو؟
ثم علاش قرار المغرب "الاستدعاء الفوري لسفير صاحب الجلالة بلاهاي، للتشاور، وستدرس إمكانية عودته إلى منصبه الوظيفي حسب تطور هذا الملف. ياك فالعرف الديبلوماسي قرار استدعاء السفير اجراء كتسبقو اجراءات اخرى علاش هاد التصعيد.
ثم اقحام الاتحاد الاوربي واش غادي يعطي شي نتيجة. اللي يمكن يتقرا من هاد البيان بالاضافة الى اظهار المغرب انه لا يحمي افراده من سلطة دولته هو انه يهدد بعدم التعاون مع اوربا فمحاربة تهريب المخدرات. كيف ما كان اوربا اقوى منا ماشي باقتصادها فقط بل بقوانينها اللي كتحمي مواطنيها. حنا خاصنا نحميو مواطنينا من سلطة دولتهم