وصلني السياسة للحضيض يا سيدي ابن عرفة. غادي يخلدك التاريخ. اگنوش: ما حشمتوش وايلى بغيتو تفعلو خطاب الملك استاقلو ودرگرو زلايفكم

ابن عرفة كل نهار كيجر السياسة للتحت كثر من ما هي. هاد السيد للي وصل لرئاسة الحكومة باسلوب عارفينو صحاب حزبو اللي تحالفو معاه٬ زاد غادي يخلي الناس تحقد على السياسيين وتزيد تحتاقرهم اكثر من الاحتقار اللي جا فالخطاب الملكي الاخير ديال عيد العرش يوم 29 يوليوز الاخير. المناسبة هاد التخربيق ديال "اعتماد 6 تدابير عملية لاجرأة مضامين الخطاب الملكي".
الاستاذ الباحث عبد اللطيف اگنوش عطاهم العصير. كتب تدوينة مفقوص على صفحته على الفايسبوك بخصوص "نقاش مضامين الخطاب" وتساءل "ولاش؟؟". الباحث اعتبر ما صرح به الناطق الرسمي باسم الحكومة مصطفى الخلفي تخربيقة كبيرة بزاف بزاف وكلاخ ما بعدو كلاخ. وتحدث عن رئاسة الاجتماع الحكومي ليوم امس "داير اجتماع حكومة على كًددو باش تناقش الخطاب وسُبُل أجرأته؟
واضاف "ماحشمتيش؟؟ آشنو في الخطاب ما يتأجرأ ولا مايتفععَل؟؟ إيلى بغيتو آحنيني تقومو بتفعيل الخطاب الملكي، هو تستاقلو جميع وت….. وتضرركًو زلايفكوم…حينت هاذ الشي للي كاين في الخطاب"
الباحث قدم لهم نصيحة "مابغيتوش أو ماقدرتوش ودرتو عين ميكا، وعلى الأقل كان خاصصكوم تديرو اجتماع المجلس باش كل واحد فيكوم يعطي برنامج مفصصل عن مشاريع القطاع ديالو، وتواريخ إنجاز كل مشروع، وشحال كايسوى، وطرق مراقبة إنجازه من أجل ربط المسؤولية بالمحاسبة…وسددينا…تفووو ماعممر…. ماتتكًاددو"