استقالة الياس العماري من الامانة العامة لحزب الاصالة والمعاصرة ثم تراجعه عنها خلال المجلس الوطني المنعقد البارح بالصخيرات تلفات كلشي. كلشي داخ ما عرفش واش استاقل ولا اللا واش رجع ولا اللا. اجيو نشوفو بيان المجلس الوطني اش قال فبيانو الرسمي: قال بان المجلس الوطني اقر "عقد دورة استثنائية للبث في هذا الموضوع في ضوء مقترحات عملية سيتم إعدادها من قبل أعضاء سكرتارية المجلس الوطني،ورئاسة المجلس، وأعضاء من المكتب السياسي، وعضو واحد عن كل جهة". اي غادية دار لجنة فيها رئيسة المجلس الوطني واعضاء من سكرتارية المجلس واعضاء من المكتب السياسي وغادي يكون فيها التوازن حسب مصدر من "البام" ل"كود"٬ اي صحاب الياس واللي ضدو. بالاضافة لهاد الشي غادي يكون اعضاء من 12 جهة من جهات المغرب. مصدر "كود" قال باللي هاد العضو غادي يتم انتخابو لتمثيل الجهة. هاد اللجنة غادية دير مقترحات لاجتماع المجلس الوطني المقبل: اما استقالة الامين العام والمكتب السياسي وتنظيم مؤتمر استثنائي لانتخاب امين عام جديد ومكتب سياسي جديد او استمرار الامين العام المستقيل في اداء مهامه. ما فهمتو والو؟ هاد الشي اللي عطى الله. المهم ان الياس العماري دابا هو الامين العام حتى تنعاقد الدورة القادمة فغضون الشهرين المقبلين
