وا زغنون واش فخبارك فضايح الاوطيلات لي كتسيرها. قراو تشوفو فضايح الشفارة ففندق ميركور الناظور التابع للسيديجي

فضايح فنادق سيديجي والشفارة لي واقعة فيهم مكتساليش، والمشكل طبعا ماشي هنا، المشكل انه ملي كيتشد الموظف لي فارع الاوطيلات كيقولوليه غير قدم استقالتك وسير بحالك ماشي مشكل راه هادي غير فلوس الشعب.
فندق ميركور الناظور لي هضرات عليه كود فتحقيقها على فنادق السيديجي لي كتعرف خروقات كبيرة، واقعة فيه فضيحة كبيرة وكولشي باغي يخبيها.
وحسب مصادر خاصة ل"كود"، فقد حلت لجنة بالفندق المذكور قبل ثلاثة أيام، ولقاو المدير ديال المطعمة لي سميتو طارق خارج كونجي، السيد دخلو عندو للبيرو ديالو وهوما يلقاو لفضيحة والكارثة، جبدو من داخل المكتب خمور مهربة مدخلها السيد للفندق بطريقة غير قانونية، وبما أنه هو المسؤول عن مطاعم والحانة والملهي الليلي داخل الفندق، فهاد الحمور لي كتشرى قرعة ديال الفودكا ب140 درهم عند الگرابة غاتولي تباع داخل الفندق ب1250 درهم.
السيد خرجولو من البيرو ديالو عرام ديال الشراب فيه المهرب وفيه غير المهرب، وملي عيطوليه مالقا مايقول ليهوم وباش يرد.
من غير هادشي اللجنة شدات فضيحة كبيرة تا هي من بعد ماكتاشفات أن كاين حجوزات فالفندق ولكنها ماشي مسجلة فالسيستيم يعني الزبناء لي كاينين فالفندق كاين فيهوم لي مسجل وكاين لي مامسجلش ويقدر يخلص ولفلوس كاع مادخل للشركة.
المشكلة الكبيرة هي ان اللجنة عطات تقريرها الخايب للمدير العام للفندق خالد بنجلون، السيد قالوليه عندك قرار من اثنين طردو او تعيط للبوليس، هو قال للموظف مول لفضيحة قدم استقالتك وبغا يعطيه من الفوق تعويض نهاية الخدمة!.
واسي زغنون هذا راه مال عام وهاد المدير ورباعتو جالسين كيلعبو فيه وتا واحد ماقادر يتحرك ويوقف هاد التسيب، والفندق بدل ما يدخل الملايير موحال واش كيدخل مصاريفه مقادة.