فيلم ” غزية” ديال عيوش : المندبة كبيرة و الميت فار ! بغا يهضر على كلشي على المثلية و على ليهود و على العيالات و على الأمازيغية و على التعليم و الشوماج و فالالخر ماهضر على والو بطريقة عميقة !

كالعادة مع أي فيلم مغربي هادي تقريبا سيمانة مشيت تفرجت ففيلم ” غزية ” لنبيل عيوش فميگاراما ! طبعا ماكانش يمكن ليا نزگل الفيلم لي كلشي كايهضر عليه و لي هادي مدة وانا كانشوف التيزر ديالو فاليوتوب !
القصة ديال الفيلم هي عبارة عن مجموعة د القصص كاطرا فأزمنة مختلفة بين الماضي و الحاضر لبزاف ديال الشخصيات و كاتكون عندها نقطة تقاطع فالحاضر !
القصة كاتبدا فالثمانينات باستاذ كايقري فمدرسة بعيدة فالجبل فمنطقة الناس ديالها كايهضرو بالامازيغية و الاستاذ لي كايقري من نيتو و باغي يوصل رسالتو كايختار انه يدرس الدراري بالامازيغية عوض العربية، الشيء لي غادي يخلق ليه مشاكل مع الوزارة لي غاترفض هاد الطريقة و غادير عليه ضغط يخليه يهرب من داك الدوار و يخلي موراه التلاميذ و قصة حب مع واحد السيدة لي حتى هي غادي تختار تهز ولدها و تهرب من الدوار باش تتبع الاستاذ ( الحبيب ديالها ) تقلب عليه فكازا … الفيلم غايخرج من الثمانينات و غايجي للحاضر و غايوريك قصة امرا شابة بوگوصة عايشة فكازا، من مستوى معيشي متوسط الى لاباس عليها كاتبغي تلبس و تعيش و تسكر و تشطح و كاتلقا راسها مصاطحة مع مجتمع مقيد بسلاسل ديال الجهل و الافكار الخرائية لي كاتخليها عايشة مديرونجية بالتناقضات مع شريك حياتها لي علاقتها معاه ماشي تالهيه ! وكاتحمل منو كاتختار طيح الدري بطريقة تقليدية … و قصة ثالتة ديال يهودي مغربي عايش مع باه كايعاني من جوج جهات حيت المرا لي بغاها رفضاتو حيت يهودي و حيت باه لي راجل كبير كايحس بلي مابقاوش ليهود فالمغرب معامن يعيشو و يتعايشو و فحالا بلاصتهم هنا و لات مهددة …! و قصة رابعة ديال بنت مراهقة صغيرة غاتكتاشف راسها بلي هي مثلية و كاتميل لبنت من جنسها ! و قصة خامسة ديال شاب عزيز عليه يغني فحال فريدي ميركوري و لكن باه كايرفضو و الدراري فالدرب كايتمسخرو عليه… هادشي كلو كايوقع لهاد الشخصيات وسط واحد المدينة ( كازا) لي كاتعيش د غليان اجتماعي و احتقان بسبب الشوماج لي كايخلي الزناقي عامرين بالدراري كايحتجوا و كايغوتو و كايهرسو الحوانت و الطموبيلات …
مجموعة قصص ! و كل قصة فيها موضوع و كل موضوع هوا بحد ذاتو طابو! باش فاللخر المخرج يقوليك بلي دااااك الاستاذ لي كان فالجبل النهار الأول و كان باغي يقري الدراري بالامازيغية و ماخلاتوش الدولة و بززات على التلاميذ يقراو باللغة العربية لي ماكايفهمو فيها تاوزة ! بسباب هادشي باش وصل المجتمع اليوم لهاد الدرجة من الجهل و الفقر و الاقصاء و الغليان لي صورها الفيلم !
الفكرة ككل مزيانة ! و واضحة ! و التصوير كان على مستوى مزيان ! و لكن واخا هكاك أنا شخشيا الفيلم عصبني اكثر ماعجبني ! حيت عيوش فهاد الفيلم دار فحال داك البلومبي لي كاتجيبو عندك للدار و كايحفر ليك هنا و هنا و لهيه و يخلي ليك الحفاري و يزيد خلفة مع الطريق بلا مايسد تا حفرة فيهم و الما كايبقى عليك فايض ! بغا يهضر على كلشي و ماهضر على تاحاجة بشكل واضح و عميق ! بالعكس ، المواضيع طرحات بطريقة سطحية جدا كاتضرها اكثر ماكاتنفعها !
باغي تهضر على الأمازيغية و لغة التدريس فالمغرب و العلاقة ديالها بالمجتمع و الجهل و الفقر و انعدام فرص الشغل
باغي تهضر على وضعية المرا وسط مجتمع ذكوري كايشوف فيها عورة خاصها تستر راسها
باغي تهضر على الزملة
باغي تهضر على الشباب لي كايختار طريق الابداع و ماكايلقاش الفاميلا لي توقف معاه
باغي تهضر على الاجهاض لي كايتم بطرق سرية خطيرة
باغي تهضر على ليهود فالمغرب و كيفاش كاتخوا عليهم الدنيا شوية بشوية و كايبقاو وحدانيين…
باغي تهضر على كلشي و فاللخر ماهضرتي على والو !
انا لي كايبقا فيا اكثر هوا هاد الفيلم كامل بهاد المواضيع كاملة و هاد القصص كاملة كايبقا غا قرطاسة خاوية ! فوس اليرط ! دوخني و شتت ليا افكاري و ماخلاني نشد فحتى شي فكرة بطريقة عميقة … بغيتي تناقش المواضيع الحساسة مرحبا ! وي ! المجتمع محتاج لفحال هاد النقاشات و محتاجين نطرحو اسئلة … و طبعا ماشي مطلوب منك كمبدع انك تعطي الاجوبة ! و لكن كيفاش بغيتي هاد المشاهد يطرح أسئلة و نتا جمعتي ليه عرام ديال الطابوهات و الاشكاليات و العقد و عجنتيهم و لحتيهم ليه ففيلم واحد ديال ساعتاين بطريقة مخبلة!؟ مايمكنش ! راه كل واحد و لا جوج من هاد المواضيع خاصو فيلم و افلام ديالو بوحدو و يا الله يا الله نقدرو نطيرو الصدا على هكذا مواضيع.
هادشي علاش للاسف ” غزية” بالنسبة ليا كايبقى فيلم يمكن تلخصو فواحد المثل شعبي معروف ” المندبة كبيرة و الميت الفار”