التواصل لعوج كيزعزع لبلاد. شكون يگول لامي باللي الملك ما ماتش وطبعا ما يكونش هاداك بحري ديالهم

مشيت نشوف مي باش جيت من السفر. وصلت الاحد اللي فات بعد ما تسالمنا وتساولنا على الصحيحة٬ فاجئاتني بالسؤال: وليدي واش الملك بصاح مات؟ قبل ان تضيف “راني فين ما نصلي ندعي معاه يحفظو لينا ولوليداتو وعائلتو. السؤال فاجأني. كيفاش مرا كبيرة صلتها الوحيدة بما يقع فالمغرب هو القنوات الوطنية. ما كاين لا فايسبوك لا انترنيت اي انها مهنية من داك التخربيق ديال سفيان بحري وللي بحالو. هاد المرا وصلاتها اشاعة وفاة الملك محمد السادس اللي طلقاتها البوليساريو عبر مواقع تابعة ليها.
طبعا واخا تجاوبها وترد عليها وتقول ليها راه بخير٬ كيبقى المشكل كاين ومشكل كبير يتحمل مسؤوليتو اللي مكلفين بالتواصل فالقصر. اشاعة بدات صغيرة بعد العملية الجراحية اللي تجرات للملك على القلب ففرنسا ثم انتشرات فالمجتمع وعوض يكون اسلوب ذكي عقلاني للرد على هاد الاشاعة مشاو كيقلبو على نشر صور للملك محمد السادس فباريس مع نكرات مع بعض المشاهير =الدبوز=.
سؤال مي على صحة وفاة الملك سولوه عدد كبير من المغاربة. لمغاربة اللي ما كيقراو لا الفايس لا الانترنيت. اللي ما كيقراو الصحف اللي ما كيشوفوش البرامج الاخبارية فقنوات اجنية. صلتهم الوحيدة بما يقع فالمغرب هو “الاولى” و”دوزيم” وباقي القنوات العمومية بالاضافة الى “ميدي 1 تي في”. صلتهم هي الاذاعات الخاصة. هاد الشي ديال المرض ما طرقوش ليه فهاد وسائل الاعلام. لهاد السبب الشعب بقى دايخ. دوختو فالحقيقة ما بدات كتنقص حتى بان فالصورة مع ولي عهد السعودية محمد بن سلمان ورئيس الحكومة اللبنانية رفيق الحريري بمطعم باريسي ومن بعد كان اللقاء مع رئيس فرنسا ماكرون ثم العودة الى المغرب البارح الاثنين 16 ابريل 2018.
هاد الاسابيع الاخيرة ماشي غير امي اللي خافت. الرواج فالمغرب تأثر. كلشي كلى لعصا. ووسط هاد التخربيق اش وقع؟ مخرجين لينا مرة اخرى سفيان بحري. بغاوه هو اللى يتواصل. هو اللي يقول للمغاربة اش واقع. لحسن الحظ ان فئة من لمغاربة ما عارفاش بوجودو كاع وفئة اخرى ما كتعتابروش وجهة ثالثة كتقول ملكيتنا تستحق اهتماما احسن من هاداك بحرى