نايضة فالبي جي دي بسباب ملتقى الشبيبة بكازا. رسميا بنكيران مازال ما توصلش باستدعاء وها موقفو وقياديون ربطو بين الحصول على الترخيص واستبعاد حامي الدين

علمت “كود” ان الامين العام السابق رئيس الحكومة السابق عبد الاله بنكيران لم يتوصل بعد باستدعاء لحضور الملتقى الوطني الرابع عشر بالدار البيضاء لشبيبة الحزب واللي غادي يبدا ففاتح غشت. اللي وقع لحد الان وفق مصدر “كود” هو ان ناس الشبيبة جاو لعند بنكيران ورغم التحفظ اللي كان عندو عطا الموافقة المبدئية٬ لكن لحد الان مازال ما توصلش بالدعوة الرسمية خاصة ان هاد الدعوة ولات مهمة لحضورو بعد النقاش الدائر بين الشبيبة والامانة العامة للحزب اللي باغية تحكم فيه.
وفي موضوع ذي صلة علمت “كود” ان بعض قيادة الحزب وصل بيهم النيفو الطايح حتى طلبو من الشبيبة تحيد عبد العالي حامي الدين من المشاركين فهاد الملتقى وربطو هاد الشي بالحصول على ترخيص. طبعا رفض المنظمون ذلك وخداو الترخيص فعين الشق فكازا.
وفق مصدر “كود” فان هادا غير تخربيق واجتهاد خاوي من قبل هاد الاعضاء وحتى حد ما طلب منهم شي حاجة. وكان محمد أمكراز الكاتب الوطني لشبيبة “العدالة والتنمية” نفى وجود اعتراض من طرف تيار “الاستوزار” على حضور زعيم “البيجيدي” الإله ابن كيران والقيادي عبد العالي حامي الدين لإشعال الملتقى الوطني الرابع عشر بمدينة الدار البيضاء. طبعا امكراز دار السياسة وحاصل باغي يدير الخير فكلشي