يوم قبل بدء محاكمة بوعشرين نايضة فاخبار اليوم”. صحافيون وقفو الخدمة وها اللي حل المشكل

ازمة فازمة كتعيشها جريدة “اخبار اليوم”. مؤسسها الصحافي توفيق بوعشرين اللي تحكم عليه ابتدائيا غادية تبدا غدا محاكمتو الاستئنافية. محاكمة فيها بزاف ما يتقال. تهم كثيرة فشي شكل. هاد الشي اثر على تدبير اليومية.
علمت “كود” باللي الصحافيين وقفو الخدمة هاد الصباح ورفضو يكتبو المواد. صحافي منهم قال ل”كود” باللي دارو وقفة وسط قاعة التحرير فالطابق 17 من عمارة الحبوس فشارع الجيش الملكي فكازا.
المكتب النقابي احتج على تأخر الصالير وقضية يقسمو الفلوس 50 في المائة في 13 في شهر ونص لاخر في اخر شهر.
الادارة مقاتلة باش تضمن للعاملين فلوسهم. ازمة الاعلانات مع ازمة البيع زادت عقدات مالية الجريدة.
وقد تدخل صحافيون منهم سليمان الريسوني باش يبردو الطرح ويرجعو يكتبو باش يخرج العدد غدا.
جريدة تستحق وضعية احسن من هاد الشي. الصحافيون مساكن عندهم التزامات ما يقدروش يصبرو وادارة مغلوب على امرها كتقاتل باش تبقى “اخبار اليوم” عايشة.