[email protected] أماط المجلس الوطني لحقوق الإنسان عن تشكيله رؤساء لجانه بالجهات الجنوبية الثلاث، عصر يوم الجمعة، حيث غير المجلس الوطني من تركيبته بشكل كلي على مستوى الصحراء. التعيينات الجديدة ديال المجلس الوطني جوج منها سبق ل”كود” قبل شهرين تأكيدها ويتعلق الأمر بابراهيم لغزال رئيسا للجنة الجهوية للمجلس بجهة كلميم-واد نون، و توفيق برديجي، رئيسا للجنة الجهوية للمجلس بجهة العيون-الساقية الحمراء، في حين كانت المفاجأة الكبرى تعيين الإستقلالية ميمونة السيد، رئيسة للجنة الجهوية للمجلس بجهة الداخلة –وادي الذهب. نجيو للتعيينات التي تخص الصحرا بمعنى اللجان الجهوية لي عندها تماس مباشر بنزاع الصحرا ولي عندها احتكاك مباشر بالأمم المتحدة ومجلس الأمن والإتحاد الأوروبي وغيرو، إختيار توفيق برديجي بديلا للرئيس الأسبق محمد سالم الشرقاوي حسب كثيرين كان غير صائب ببساطة لأنه ما يمكنش تجيب بنادم للعيون لي هي حساسة وتستعمل “باراشيت” تجييب بنادم ما عارف فيها والو ما عندو فيها قاعدة وتاخد الشق الحقوقي من نزاع الصحرا لأكثر جهة حساسة، وهادشي غادي نشوفوه مباشرة فاش غادي يبدا توفيق برديجي خدمتو. المعروف عن توفيق برديجي حسب ما استقاتو “كود” من عند مصادر خدمات معاه فجهة كلميم وادنون هو أنه ما يمكنش ليه يتفاهم مع الطرف الآخر وما عندوش آلية واخا غير تواصلية باش يتواصل معاها مادام قاموسو الحقوقي مرتابط بقاموس سياسي أكل عليه الدهر وشرب. تعيين البرديحي عرى بزاف ديال الحاجات عندنا فجهة العيون الساقية الحمراء وهو أنه كاينة جهات لا تؤمن بكفاءات هاد المنطقة وما بغاتهاش تخدم ولا تكون فواجهة شي حاجة وهادشي غادي نجنيو ثمارو من بعد ما يطيح الفاس فالراس. هاد المنصب راه خاص فيه كفاءة من ولاد التراب من ولاد المنطقة لي عارفين عليها كلشي ماشي تعطي لواحد الزانة وتدفعو ليها دفع بلا ما تفكر حتى فالمستقبل القريب. وولاد المنطقة موجودين ومستعدين وسيفياتهم والكاريير ديالهوم حسن من ديال توفيق برديجي. على الأقل كان على المجلس الإبقاء على محمد سالم الشرقاوي رئيسا للجنة بحكم ما راكمه من تجربة وعلى ود نكران الذات لي خدم بيه وجنينا من ورائه بزااااف ديال الحاجات على غرار الإشادات فالتقارير الأممية وقرارات مجلس الأمن الدولي. تعيين ولد برديجي اليوم على رأس اللجنة الجهوية للعيون الساقية الحمراء هو ضرب للحكم الذاتي وللجهوية وغيرو وما يمكنش نخدموها ولا نطبقوها ما حد ما زال شي ناس كتخدم خلف الستار وكلنا كنعرفوهم وفيهم والي جهة مازال فالادارة الترابية ومسؤول فمنصب سامي. من جهة أخرى الداخلة كان من نصيبها اسم نسائي ولد التراب ويتعلق الأمر بالإستقلالية ميمونة السيد لي دارت كاريير وخدمات على راسها من مستشارة جماعية الى مسؤولة تنظيم المرأة الإستقلالية بجهة الداخلة وادي الذهب لفاعلة مدنية وحقوقية تقمصات مسؤولية عديد المنظمات والجمعيات الحقوقية. من خلال تعيبنها كيبان بأن المتدخلين فالمجلس اختارو مقاربة النوع ودارو امرأة فرئاسة لجنة جهوية واختارو انها تكون الداخلة لأن الداخلة ماشي بحال العيون والصراع فيها مع الضفة الأخرى محدود يمكن ليها بحكم معرفتها بالمنطقة انها تخدم في صمت وبحكمة لأنها عارفة المنطقة. المؤاخذة لي كاينة على ود عضو بلدية الداخلة ميمونة السيد هو أنها ناشطة استقلالية وبالتالي فإن خدمتها خاص تكون بعيدة على الحزب وتراعي البعد الحقوقي في عملها بعيدا عن الانتماءات الحزبية، بمعنى آخر أن تعيينها فالمنصب كان عندو علاقة بالحزب ديالها، بالآضافة لانامائها القبلي “اولاد الدليم” لي باتو يحتكرون المناصب فالجهة ومن حقهم بحكم ارتباطهم التاريخي بالمنطقة وعندهوم كفاءات.
