عموتة عيط على 28 لعاب لماتش الجزائر.. 2 جداد و13 من الوداد والرجا

الحسين عموتة، مدرب المنتخب المحلي عيط ل28 لعاب باش يلعبو الماتش ديال الجزائر نهار 18 أكتوبر الجاري بالملعب البلدي فالقنيطرة ضمن إياب الإقصائيات الإفريقية المؤهلة إلى نهائيات كأس إفريقيا للمحليين، لي غادي تكون فالكامرون في يناير المقبل.
عموتة عيط لگاع اللعابة لي كانو في ماتش الذهاب، باستثناء الإبعاد ديال حارس الوداد البيضاوي، الموقوف من طرف الجامعة، بعدما رفض يكون روبلاصون ديال الحارس أنس الزنيتي فالماتش ديال الجزائر.
اللائحة عرفت استدعاء جوج اللعابة جداد للمنتخب المحلي، ويتعلق الأمر يزيد كروش من نهضة بركان ومحمد مكحزي من المغرب التطواني.
اللائحة عرفات عودة ايوب الكعبي وعمر بوطيب وكريم باعدي ومهدي اوبيلا.
عموتة هاد المرة استدعى 6 اللعابة من الوداد البيضاوي و7 من الرجاء البيضاوي وخمسة من حسنية أكادير ونهضة بركان.
وها اللعابة لي عيط عليهم عموتة لماتش الحزائر:
زهير لعروبي من نهضة بركان وعبد الرحمان الحواصلي من حسنية أكادير ومروان الهدهودي والمهدي قرناص من الدفاع الحسني الجديدي وعمر النمساوي والعربي الناجي وإسماعيل المقدم وزيد كروش من نهضة بركان ووليد الكرتي وأيوب الكعبي ومحمد الناهيري وبديع أووك ويحيى جبران وأشرف داري من الوداد البيضاوي وبدر بانون وسفيان الرحيمي وأيوب نناح ومحمود بنحليب وحميد أحداد وزكرياء الوردي وعمر بوطيب من الرجاء البيضاوي وسفيان بوفتيني وكريم باعدي من حسنية أكادير ومحمد المورابيط من أولمبيك أسفي ومحمد علي بامعمر من الجيش الملكي ومحمد مكحزي من المغرب التطواني.