نقابي نقابة الجينيراليست ل"كود": ماسديناش عياداتنا.. يوميا كنحلو وكانعرضو حياتنا وحياة ولادنا للخطر على قبل المغاربة

مجموعة من الأخبار على تناسلات بشكل كبير، كتقول بللي الجينيراليست فالقطاع الخاص حبسو الخدمة فهذ الأزمة ديال فيروس "كورونا"، وسدو العيادات ديالهم، كاين النقابات ديال الأطباء فالقطاع الخاص اللي حذرات من هذشي، وكاين اللي كذبات، كشأن النقابة الوطنية للأطباء العامين.
العضو فالنقابة، محمد لمزوري، قال بللي "كاينة حملة شرسة ضد أطباء الطب العام، فعلى عكس ما يروج، جلهم فاتحين العيادات وخدامين ومواكبين" على حساب كلامو.
وأكد بللي هذ الأطباء كيخدمو يوميا، وكيخرجو مع 6 أو لا مع 4 إل كان عندهم توقيت مستمر، "وكاين اللي ماخدامينش بالصح حين عندهم أمراض وسرطانات وعاهات، وماشي حتى جات كورونا"، كيف قال.
وقال لمزوري بللي ليجينيراليست مازال كيمارسو خدمتهم، لكن المشكل كاين فالعيادات اللي مامعقماش، فوقت اللي خاصها تتعقم صباح وعشية مع هذ الوباء، واكد بللي الاطباء هكذا كيضحيو بحياتهم وكيخاطرو بحيات ولادهم على قبل المغاربة.
ويشار بللي المجلس الجهوي للأطباء فالقطاع الخاص حدد ليست ديال 200 طبيب عندهم ترخيص باش مايحلوش، لأسباب مرضية، لكن من غيرهم ما عند حتى شي حد الحق يتخلف بدون أعذار مقبولة، وإلا غيعرض راسو لعقوبات تأديبية.