أرقام وفيات كورونا مشكوك فيها.. المديريات علنو على 4 والوزارة قالت غير 2.. فين كاين المشكل؟

لبارح 5 ماي فحدود الربعة دالعشية، علنات وزارة الصحة على تسجيل 2 حالات دالوفيات فالأقاليم.. لكن فالليل مديرية جهة كازا سطات علنات على حالة وفاة جديدة، مديرية جهة طنجة تطوان علنات على حالة وفاة جديدة حتى هي، ومديرية مراكش آسفي علنات على جوج وفيات، هي 4 فالمجموع.
أي متتبع لاحظ هذ التضارب فالأرقام يتساءل ويشك فأعداد الوفيات واش مضبوط ولا لا؟ وواش كاين تنسيق بين المديريات الجهوية باش ما يوقع حتى شي ديكالاج يخلي المتتبعين يتخربقو، خصوصا وأن الظرفية كتستدعي الكثير من الدقة فهذ الأزمة الوبائية، خصوصا وأن المعطيات ديال الوزارة والمديريات كيجيو فنفس الفترة، وكيهمو نفس المدة الزمنية.
ماشي جميع المديريات كتعلن على حالات الإصابة والوفيات الجديدة، لكن كيمكن لأي ممتبع يدير عملية حسابية بسيطة ويعرف الفرق بين الإصابات دلبارح واليوم وشحال تزادو، نفس الأمر بالنسبة للوفيات وحالات التعافي، وبالتالي لا مجال للخطأ فبحال هذ الأمور لأن اضطراب المعطيات من المصادر الرسمية يقدر يخلي المواطنين يشكو، ويقدر يوصل بيهم الحال لأنهم يفقدو فيها الثقة.
دابا الوزارة مطالبة باش تعطي توضيح فهذ الموضوع، أو على الأقل تضيف عدد الوفيات الجوج اللي ماحسبات فالحصيلة ديال اليوم فالصباح مع العشرة، ويكون حسن لو خلات المواطنين يوصلو للمعلومة المتعلقة بالجهات والأقاليم من مصدر واحد، بمعنى من الموقع دالوزارة نيت، باش مايوقع حتى شي ارتباك او خلط أو تضارب فالأرقام.