أشنو مصير صحاب باك ليبر؟ مصدر من وزارة التربية الوطنية ل"كود": أمزازي ماساعفوش الوقت باش يتكلم على جميع القرارات واليوم غادي نصدرو بلاغ شامل

بزاف ديال الممتتبعين تساءلو على مصير صحاب البكالوريا أحرار هذ العام مع أزمة فيروس كورونا، بحكم أن سعيد أمزازي، وزير التربية الوطنية والتعليم العالي وتكوين الأطر والبحث علمي، فجلسة الأسئلة الشفوية بمجلس المستشارين، ماتطرقش لهذ النقطة، وتكلم فقط على مواعيد امتحانات السيزيام والباك العادي، وبزاف ديال التلاميذ الأحرار حسو بللي مصيرهم صبح مجهول، وتساءلو واش غيتم إلغاء امتحاناتهم.
مصدر من وزارة التربية الوطنية أكد ل"كود" بللي الوزارة مانساتش هذ الفئة، وبللي "الوزير مالقاش الوقت الكافي باش يكلم على جميع القرارات فجلسة الأسئلة الشفوية اللي كانت اليوم فالغرفة الثانية".
وكشف المصدر بللي الوزارة فهذ الأثناء "كتقاد بلاغ شامل فيه جميع القرارات اللي تخادت بالتفصيل الممل، وكيتطرق لحالة صحاب البكالوريا الحرة، وغايتم تزويد الصحافة بيه فالساعات القليلة القادمة".
وللإشارة، سعيد أمزازي كشف اليوم بللي غيتم إجراء الامتحان الوطني للسنة الثانية بكالوريا فهذ الموسم الدراسي خلال شهر يوليوز 2020، والامتحانات الجهوية للسنة الأولى غادي تدوز فشهر شتنبر 2020، وهو نفس الشهر اللي غيرجعو فيه التلاميذ للقرايا، ولا وجود لسنة بيضاء.