بالفيديو: طاشرون ملايري دخل السياسة مع البام دار قصارة راس العام فالداخلة. هشام الصغير خرق الطوارئ الصحية وما شدوه ما اعتاقلوه

طاشرون ملايري اسمو هشام الصغير كيرأس المجلس الاقليمي بوجدة وعندو شركة لبني "عقار الشرق" دار قصارة راس العام فالداخلة. حتى لهنا كلشي عادي غير هو هاد العام ما فيه حتى حاجة عادية. مع قوانين الطوارئ الصحية ممنوع لقصاير ايلى فات عدد محدد وخاص التباعد الاجتماعي. كلشي مزير وصافي.
فالفيديو اللي تسرب من هاد لقصارة كان خرق فكلشي من الديدجي حتى الراقصة والحضور. عرضو على الناس من كازا والرباط وغيرها باش يهبطو للمدينة الهادئة فالصحرا
https://www.facebook.com/1292968250744243/posts/4826529187388114/?vh=e&d=n
السياسي البامي والطاشرون اللي عندو مشاريع بناء فيلات فالداخلة دار لقصارة وفق مصدر "كود" فشي فيلا على خليج وادي الذهب فراس العام. خلق لراسو قانون خاص بيه ضد قوانين الدولة.
اللي غريب بزاف هو كيفاش السلطات غمضات عليه العين. اكيد من الوالي حتى اصغر مقدم عرفو بهاد القصارة. لمدينة صغيرة وفهاد لبلاصة كلشي كيتعرف. علاش خلاوه وسمعو ليه بهاد لبسالة
وحسب مصادر "كود" فإن لقصارة جاوه فنانين مغاربة وراقصات وكانو فيه سياسيين ومنتخبين وشي ملايرية
المشكلة علاش ما طبقوش القانون على هاد هشام الصغير بافعالو وكيطبقوها على لخراين اللي بغاو يفوجو على راسهم فراس العام. علاش هاد لملايرية باغيين يديرو ما بغاو فاي مدينة فالمغرب وشكون كيحميهم باش ما يطبقش عليهم القانون.
كاع لمغاربة طلع ليهم هاد القوانين ديال الطوارئ الصحية فالراس. عياو. كل واحد باغي يقصر بطريقتو. باغي يفوج على راسو وما مسموحش عليه. علاش هاد لملايري يديرها وهانية.
ايلى سياسي غربي وحصل مقصر فدارو غادي يستاقل ويتابعوه. يعني يخلص وبزاف وكلشي بالقانون