كان مريض بالقلب.. تفاصيل وفاة زوج الملكة إيليزابيث

اليوم الجمعة، كشفات العائلة الملكية البريطانية على وفاة الأمير فيليب مونتباتن، زوج ملكة المملكة المتحدة، فسن 99 عام، بعد ما رافق الملكة لازيد من قرن من الزمن، بسبب مشاكل فالقلب.
وكان فيليب مزوج بالملكة من 1952، وتم الإعلان على خبر الوفاة غير قبل قليل عبر الحساب الرسمي ديال العائلة المالكة فتويتر، وتلقاوه المتابعين بانبهار، بسباب طول عمر الأمير ووفاتو فهذ السن المتقدم.
وحول سبب الوفاة، فالأمير دخل لسبيطار إدوارد السابع، وخضع لعملية على القلب بعد ما عانى من ازمة قلبية، وتكلف بيه طاقم على قدو متخصص فامراض القلب والأوعية الدموية، وهو الافضل فأوروبا، وكان رجع من بعد لدارو ف16 مارس.
وماشي هذي أول مرة يمرض الامير، ف2017 دخل السبيطار ودوز يوماين ديال العلاج، وخضع لعملية جراحية على الفخذ ف2018، وف2019 كَلس فالسبيطار لمدة ربعيام بسبب وعكة صحية، بعد ما كان دار كسيدة خايبة فنفس العام لكن ماجرا ليه والو، الشي اللي خلاه يحبس الصوكَان.
وفمدة زواجو بيها، شارك الامير ف22 ألف مشاركة رسمية عامة، جنبا إلى جنب مع الملكة، قبل ما يعلن ف2017 اعتزالو بشكل نهائي الحياة العامة، قبل أسابيع قليلة من عيد ميلادو ال96، إيدانا بانه مابقاش قادر يمارس السياسة بسبب سنو المتقدم وتدهور صحتو.
والامير والد مع الملكة ربعة ديال الدراري، الأمير تشالز المزيود ف1948، وآن المزيودة ف1950، وأندرو ف1960، ثم إيدوارد ف1964.