10 كذبات روجها الاعلام الاسباني فحق المغرب خلال هاد الازمة: فلوس الاتحاد الاوربي كتمشي للملك ودرنا كاميوات باش نقلو القاصرين والرباط كتصدر الارهابيين

خلال هاد الازمة اللي واقعة بين المغرب واسبانيا، حاول اعلام الصبليون أنها يهاجم المغرب بأي طريقة. ماشي طبعا كاع الاعلام ولكن جزء منو. وكالة الانباء الاسبانية "ايفي" مثلا دارت خدمة متوازنة. مكتبها فالرباط كان مهني. لكن قنواتهم على العموم من الاولى حتى الثالثة والرابعة والخامسة والسادسة دوزات فبلاطواتها كذبات كثيرة.
كود جمعات عشرة ديال أغبى الاكاذيب لي روجها الاعلام الاسباني باش يكذب على الصبليون. فازمة بدات فدخول ابراهيم غالي نهار 18 ابريل بباسبور ديبلوماسي جزائري وهوية مزورة لصبيطار باش يتعالج من كورونا بلا ما يخبرو المغرب. هاد لشي خلى ازمة بين الدولتين تكون وسالات بشوهة دخول شي 10 الاف مغربي فيهم اطفال وقاصرين من كاستييخو لسبتة المحتلة. هاد الشي اعتبراتو مدريد "ابتزاز" ووزيرة دفاعهم مشات وصفاتنا ب"العدو الخارجي".
هادي شانطيو من هاد الكذبات اللي روج اعلامهم. بين باللي تصورهم للازمة ما عندو علاقة بتصور لمغاربة ليها. هما فعالهمهم وحنا فعالمنا.
الكذبة الاولى: فلوس الدعم الاوروبي كتمشي للملك:
هادي بداتها قنواتهم وحتى صفحهم المعروفة. هدرو على ثورة محمد السادس وربطو الدعم اللي كياخدو المغرب من الاتحاد الاوربي اللي هو 30 مليون اورو واللي كتكون عبارة عن اليات ووسائل لمراقبة الحدود٬ قالو كتمشي للهولدينگ الملكي. اولا هاد الهولدينك ما عندو حتى شركة عندها علاقة بالحدود وداك الشي. كذبة كبيرة هدفها شيطنة المغرب وصافي.
فلوسهم كتكون مساعدات فاغلبها. راه المغرب مجند 20 الف شخص. جيش كبير باش يحمي هاد الحدود. الدعم راه قليل مقارنة حتى بالدعم اللي كتاخدو تركيا
الكذبة الثانية: السلطة جابت لمغاربة فكاميوات من المدن المجاورة وحطاتهم حدا الحدود:
هادي كذبة روجو ليها صحافيين فقنوات وطنية. حتى حد ما كذبها. قالو باللي الدولة المغربية جندات طوبيسات وكاميوات باش تنقل هادوك 10 الاف حتى لكاسييخو ومن بعد وصلو لسبتة. كذبة راجت واخا قنوات اللي تروجات فبلاطواتها عندها مراسلين ومراسلات فكاسييخو وعارفينها ماشي صحيحة
الكذبة الثالثة: كريستانو رونالدو فسبتة:
تصريح لقاصرين دوزو الاعلام الاسباني بلا ما يدير حتى مجهود يسول نفس الاطفال والقاصرين سؤال اخر؟ فين كيلعب رونالدو؟ كلهم اكيد غاديين يقولو راه فاليوڤي فايطاليا. اطفال ضحكو عليهم ولكن الاعلام الاسباني باش يصور بلادنا بصور كاريكاتورية دوزها واعتبرها حقيقة.
الكذبة الرابعة: غزو المغرب لاسترجاع سبتة ومليلية
هاد الكذبة روج ليها الحزب اليميني المتطرف ونقلاتها صحفهم. قالت باللي هادا ماشي هجرة ولكن "غزو" المورو لاسترجاع سبتة ومليلية وحتى الاندلس. واييه. الحروب السياسية الداخلية توظفات باش تعطي صورة مجرمين لاطفال وشباب.
الكذبة الخامسة: المغرب رسل لينا ارهابيين فهاد الموجة:
الاعلام الاسباني روجها بزاف خاصة جريدة "ال اسبانيول" اللي فيها صحافية ديما كتكذب وكتنشر الاكاذيب. قالت باللي من ضمن هادوك اللي دخلو كاينين ارهابيين.
دابا غير ايلى صدقنا اخبار من عندهم. دخلات شي 10 الاف او 80 الاف شخص. دابا يالله بقات شي 600 الى 800 قاصر. فين مشاو هاد الارهابيين.
الكذبة السادسة: المسيرة الخضراء المغربية:
كثير من اعلام اسبانيا روج باللي هادي مسيرة خضرا ثانية فاشارة الى الاولى اللي رجعنا بيها الصحرا. سياسيين مشاو فهاد الاتجاه باش تزاد شيطنة المغرب. هاد المسيرة زادو وقالو فيها باللي باغيين يسترجعو سبتة ومليلية...
الكذبة السابعة: المغرب دولة ديكتاروية فيها صوت واحد:
هادي كانت فاولى ساعات وصول اعداد من المهاجرين لسبتة المحتلة. كلشي اعلامهم صور بلادنا وكأنها كوريا الشمالية. ديكتاتورية يحكمها ديكتاتور وحتى حد ما كيهدر. جهنم وصافي. كيفاش ناس قراب منا بزاف وبعاد علينا بزاف. ما عارفينش المغرب او كيكذبو وكيعطيو صورة خايبة على بلادنا. حتى ماشي ديموقراطية ولكن ماشي ديكتاتورية. ثم الديكتاتورية هي ادراج صوت واحد فقط فالاعلام الاسباني هو صوتهم. ما كاينش المغربي كاع.
الكذبة الثامنة: المغرب فيه المجاعة:
هاد الشي روجوه فقنوات عندهم مراسلين فالمغرب. روجوه اعلام ورقي عندو ناسو فالمغرب. روجوه صحافيين كيعرفو المغرب. صورونا بلاد مجاعة. بلاد على حافة الانهيار.
الكذبة التاسعة: انسانية كبيرة لجيشهم وقواتهم:
الاعلام الاسباني ما هدرش على تقارير منظمات دولية على التعامل الخايب لقواتهم من جيش وحرس مدني وبوليس مع المهاجرين اللي وصلو لسبتة المحتلة. ما هدروش على فيديوات فيها هاد الجيش الاسباني كيلوح اطفال وشباب فالبحر.
اللي ركزو عليه فعملية مخدومة هو صورة تشبه ملاك لهاد القوات. فيديوات ديال هازين الاطفال والرضع. كيدورو مع اطفال. عملية شارك فيها اعلامهم وروج ليها مقابل شيطنة قواتنا العمومية. مرة كيقولو ما كايناش ومرة كيقولو راها كانت كتشفر للحراكة تلفوناتهم. وشدو غير طريق وحدة.
الكذبة العاشرة: بلادنا اسبانيا بلاد الخير وكتهلى فالاطفال والحقيقة انها كتجري عليهم فضرب للقوانين المحلية:
دابا الاعلام الاسباني قال باللي دخلات 2000 قاصر وطفل لسبتة المحتلة. من بعد نقص 500. من بعد ولى كيهدر على 650 وشي 200 مازال فالشوارع. طبعا كلشي هاد الشي فيه مزايدات. ولكن لنفرض هاد الشي كاين اي 850 وفين مشات هاد 1150 قاصر؟ رجعو للمغرب ياك؟ وعلاش رجعو المغرب والقانون الاسباني واضح. ممنوع ارجاع قاصرين. كيفاش تخرق القانون واعلامهم ساكت وكيكذب.
هادوك الصور الانسانية ديال وحدة من الصليب الاحمر كتعنق شاب من افريقيا جنوب الصحراء ولا هاداك الطفل اللي كيبكي وكيعوم ومحزم بالبوديزات. بجوجهم رجعو للمغرب. علاش نساو هاد الموضوع او حتى باش دوزوه ركزو على امور اخرى ما عندها علاقة بالعودة.
النية الاولى والاخيرة هي شيطنة المغرب